कोडीन कफ सिरपप्रकरणी आणखी तिघांना अटक

विशेष तपास पथकाची कारवाई

वृत्तसंस्था/ लखनौ

कोडीन कफ सिरप प्रकरणात वाराणसी पोलिसांनी सिद्धार्थनगरमध्ये मोठी कारवाई केली आहे. वाराणसी आयुक्तालयाच्या विशेष तपास पथकाने (एसआयटी) कोडीनयुक्त कफ सिरप तस्करी प्रकरणाचा सूत्रधार शुभम जयस्वालच्या तीन साथीदारांना अटक केली आहे. या तिन्ही आरोपींविरुद्ध आधीच लूकआउट नोटीस जारी करण्यात आली होती. नोटीस बजावल्यानंतर, वाराणसी पोलिसांनी त्यांना अटक करण्यापूर्वी हे तिघेही नेपाळला पळून जाण्याच्या तयारीत होते.

वाराणसी एसआयटीने अटक केलेल्या आरोपींमध्ये आजमगडच्या बरदाह पोलीसस्थानक परिसरातील नार्वे गावातील रहिवासी विकास सिंग नार्वे, मैदागीर गोलघरमधील आकाश पाठक आणि विकास सिंगचा सहकारी अंकित श्रीवास्तव यांचा समावेश आहे. कफ सिरप तस्करी प्रकरणात आरोपी विकास सिंग आणि आकाश पाठक यांना पोलिसांनी यापूर्वी प्रत्येकी 50,000 रुपयांचे बक्षीस जाहीर केले होते.

कोडीन कफ सिरप तस्करी प्रकरणात शुभम जयस्वालचा जवळचा सहकारी विकास सिंग नार्वे याची अटक महत्त्वाची मानली जाते. त्याला सिद्धार्थनगरमधील नेपाळ सीमेवर त्याला अटक करण्यात आली. विकास नेपाळला पळून जाण्याचा प्रयत्न करत असताना वाराणसी पोलिसांच्या विशेष पथकाने त्याला जाळ्यात पकडले. विकासविरुद्ध लूकआउट नोटीस आणि रेड कॉर्नर नोटीस जारी करण्यात आली होती.