दूध उत्पादक शेतकऱ्यांना खुशखबर... आज मिळणार दूध दरवाढ

पणजी /विशेष प्रतिनिधी

राज्यातील दूध उत्पादक शेतकऱ्यांसाठी खुशखबर असून आज फोंडा येथे आयोजित एका महत्त्वाच्या कार्यक्रमात मुख्यमंत्री दूध उत्पादकांना फार मोठ्या सवलती त्याचबरोबर दूध दरात वाढ करून देण्याची शक्यता आहे.

प्राप्त माहितीनुसार फोंडा येथील राजीव कला मंदिर येथे आज राज्यातील दूध उत्पादक शेतकऱ्यांना बोलाविण्यात आले आहे. त्या ठिकाणी मुख्यमंत्री डॉक्टर प्रमोद सावंत तसेच पशुसंवर्धनमंत्री नीळकंठ हळर्णकर आणि सहकारमंत्री सुभाष शिरोडकर हे उपस्थित राहणार आहेत. सकाळी 10:30 वाजता होणाऱ्या या समारंभात दूध दरवाढ जाहीर केली जाणार आहे.

शेतकऱ्यांना अशी मिळणार दूध दरवाढ

गाईच्या दुधावर प्रति लिटर सहा रुपये

म्हशीच्या दुधावर प्रति लिटर दहा रुपये

आधारभूत रक्कमेचाही मिळणार लाभ

या दरवाढीसाठीचे सारे पैसे गोवा डेरीकडे गोवा सरकार अदा करणार आहे. शेतक्रयांनी गोवा डेरीला दूध दिल्यानंतर त्यांना प्रति लिटर ही दरवाढ प्राप्त होईल. याशिवाय दूध उत्पादकांना आधारभूत रक्कम जी 40 टक्के आहे तिचा लाभ देखील दिला जाणार आहे. मात्र निवडणूक होईपर्यंत गोवा डेरीने दूध दरवाढ करू नये, अशी सूचना देखील मुख्यमंत्री गोवा डेअरीला करण्याची शक्यता आहे.