जागतिक घसरणीत बाजार सावरला

अंतिम सत्रात काहीशा तेजीसह सेन्सेक्स -निफ्टी सावरला

वृत्तसंस्था/ मुंबई

चालू आठवड्यातील अंतिम सत्रात शुक्रवारी जागतिक बाजारपेठेत घसरण झाली असली तरी, भारतीय शेअर बाजार तेजीसह बंद झाला. आयटी शेअर्समधील विक्रीमुळे बहुतेक व्यवहार सत्रात बाजार घसरणीत राहिला. दरम्यान बिहार निवडणुकीत एनडीएच्या आघाडीमुळे बाजार वरच्या दिशेने जात बंद झाला.

बीएसई सेन्सेक्स 400 अंकांपेक्षा जास्त घसरून 84,060 वर उघडला. अखेर तो 84.11 अंकांनी वाढून 84,562.78 वर बंद झाला. याचप्रमाणे, राष्ट्रीय शेअर बाजाराचा 30.90 अंकांनी वाढून 25,910.05 वर बंद झाला. कोटक सिक्युरिटीजचे इक्विटी रिसर्च प्रमुख श्रीकांत चौहान म्हणाले, ‘या आठवड्यात जागतिक शेअर बाजार बहुतेक सकारात्मक होते आणि भारतीय शेअर बाजारांनीही आठवड्याला चांगला परतावा दिला. बीएसई 30 निर्देशांक आणि एनएसई 50 निर्देशांक या आठवड्यात सुमारे 1 टक्क्यांनी वाढले. मिडकॅप आणि स्मॉलकॅप निर्देशांक देखील सकारात्मक राहिले, परंतु मोठ्या निर्देशांकांपेक्षा कमी कामगिरी केली.’

सर्वाधिक नफा आणि तोटा

सेन्सेक्स कंपन्यांमध्ये, इटरनल, भारत इलेक्ट्रॉनिक्स, ट्रेंट लिमिटेड, अॅक्सिस बँक, स्टेट बँक, बजाज फायनान्स, सन फार्मा आणि एशियन पेंट्स हे प्रमुख नफा मिळवणारे होते. दुसरीकडे, इन्फोसिस, टाटा स्टील आणि टीएमपीव्ही तोट्यासह बंद झाले.

जागतिक बाजारपेठेची स्थिती

वॉल स्ट्रीटच्या कमकुवतपणामुळे आशियाई बाजार घसरले. तंत्रज्ञान समभागांना पुन्हा दबावाचा सामना करावा लागला आणि फेडरल रिझर्व्हच्या संभाव्य दर कपातीमुळे अनिश्चितता कायम राहिली. जपानचा निक्केई-225 निर्देशांक 1.5 टक्क्यांनी खाली आला. दक्षिण कोरियाचा कोस्पी 2.03 टक्के घसरला आणि हाँगकाँगचा हँगसेंग 1.23 टक्के घसरला. गुरुवारी अमेरिकन शेअर बाजार मोठ्या प्रमाणात घसरणीसह बंद झाले. एआयशी संबंधित शेअर्समध्ये घसरण होती.