चढ-उतारांमध्ये बाजार नुकसानीत

सेन्सेक्स 465 तर निफ्टी 155अंकांनी प्रभावीत

वृत्तसंस्था/ मुंबई

जागतिक बाजारातील संमिश्र स्थितींमुळे शुक्रवारी आठवड्याच्या शेवटच्या व्यवहार सत्रात भारतीय शेअर बाजार घसरणीसह बंद झाला. बहुतेक क्षेत्रातील विक्रीमुळे बेंचमार्क निर्देशांक निफ्टी आणि सेन्सेक्स सलग दुसऱ्या दिवशी घसरणीत राहिल्याची नोंद झाली. बीएसई सेन्सेक्स 84,379 अंकांवर उघडला, अखेरच्या क्षणी सेन्सेक्स 465.75 अंकांनी घसरून 83,938.71 वर बंद झाला आहे.  याचप्रमाणे, राष्ट्रीय शेअर बाजाराचा निफ्टी 155.75 अंकांनी घसरून 25,722.10 वर बंद झाला.

सेन्सेक्स कंपन्यांमध्ये, इटरनल, एनटीपीसी, कोटक महिंद्रा बँक, बजाज फिनसर्व्ह, आयसीआयसीआय बँक आणि एचडीएफसी बँक हे नुकसानीत होते. यामध्ये 3.5 टक्क्यांपर्यंत घसरण नोंदवण्यात आली. दुसरीकडे, बीईएल, लार्सन अँड टुब्रो, टीसीएस, आयटीसी आणि स्टेट बँक ऑफ इंडिया (एसबीआय) आघाडीवर राहण्यात यशस्वी झाले.

तथापि, व्यापक बाजारात विक्रीचा दबाव तितकाच स्पष्ट होता. निफ्टी मिडकॅप 100 आणि स्मॉलकॅप 100 निर्देशांक अनुक्रमे 0.45 टक्के आणि 0.48 टक्क्यांनी घसरून बंद झाले. क्षेत्रीय आघाडीवर, निफ्टी पीएसयू बँक 1.5 टक्के आणि निफ्टी ऑइल अँड गॅस 0.07 टक्क्यांनी वधारून बंद झाला. याशिवाय, एनएसईवरील इतर सर्व क्षेत्रीय निर्देशांक घसरणीत बंद झाले. निफ्टी मेटल्स आणि मीडिया इंडेक्स सर्वाधिक प्रभावित झाले. यापैकी प्रत्येकी 11 टक्क्यांहून अधिक घसरले.

 सार्वत्रिक संकेत कसे आहेत?

आशियाई बाजारांमध्ये शुक्रवारी थोडीशी वाढ दिसून आली. अमेरिका आणि चीनमधील तणाव कमी झाल्यामुळे गुंतवणूकदार आशावादी आहेत. अमेरिकेचे अध्यक्ष डोनाल्ड ट्रम्प आणि चीनचे अध्यक्ष शी जिनपिंग गुरुवारी दक्षिण कोरियामध्ये भेटले. दोन्ही देशांनी एका लहान व्यापार करारावर सहमती दर्शवली, ज्यामुळे दुर्मिळ धातूंवरील वाद संपला आणि मोठे व्यापार युद्ध टळले. जपानचा निक्केई निर्देशांक 1 टक्के पेक्षा जास्त वाढून नवीन विक्रमावर पोहचला.

कमोडिटी मार्केटमध्ये काय परिस्थिती आहे?

अमेरिका आणि चीनमधील संबंध सुधारल्याच्या वृत्तानंतर गुंतवणूकदारांनी नफा घेतल्याने गुरुवारी तेलाच्या किमती घसरल्या. अमेरिकेने चिनी वस्तूंवरील शुल्क कमी करण्याचा निर्णय घेतला, ज्यामुळे किमतींवर परिणाम झाला. ब्रेंट क्रूड तेल 0.6 टक्केने घसरून 64.52 डॉलर प्रति बॅरल आणि यूएस डब्ल्यूटीआय क्रूड 0.6 टक्केने घसरून 60.13 डॉलर प्रति बॅरलवर आला. दुसरीकडे, सोन्याच्या किमतीत मोठी वाढ झाली. फेडरल रिझर्व्हने व्याजदरात कपात केल्यामुळे आणि अमेरिका-चीन व्यापार करारावरील अनिश्चिततेमुळे गुंतवणूकदारांनी सोन्यातील गुंतवणूक वाढवली.