नफा वसुलीमुळे बाजार पुन्हा घसरणीत

सेन्सेक्स 720 तर निफ्टी 183 अंकांनी नुकसानीत

वृत्तसंस्था / मुंबई

भारतीय भांडवली बाजारात चालू आठवड्यातील अंतिम सत्रात शुक्रवारी बीएसई सेन्सेक्स आणि एनएसई निफ्टी यांचे निर्देशांक प्रभावीत होत बंद झाले आहेत. यामध्ये तिमाहीमधील नफा कमाईची आकडेवारी सादर होणार असल्याच्या पार्श्वभूमीवर गुंतवणूकदार सावध झाले असल्याचे दिसून आले आहे. भारतीय बाजारातील अंतिम सत्रात मात्र नफा वसुलीमुळे घसरणीचा फटका बाजाराला बसला आहे.

अंतिम सत्रात बीएसई सेन्सेक्स तब्बल 720.60 अंकांनी प्रभावीत होत निर्देशांक 79,223.11 वर बंद झाला आहे. दुसऱ्या बाजूला राष्ट्रीय शेअर बाजाराचा निफ्टी हा दिवसअखेर 183.90 अंकांच्या घसरणीसह निर्देशांक 24,004.75 वर बंद झाला आहे. मुख्य कंपन्यांपैकी झोमॅटोचे समभाग सर्वाधिक घसरणीत राहिले आहेत. यासोबतच एचडीएफसी बँक, टेक महिंद्रा, अदानी पोर्टस, टीसीएस, आयसीआयसीआय बँक, सनफार्मा, आयटीसी, लार्सन अॅण्ड टुब्रो, एचसीएल टेक, भारती एअरटेलचे समभाग हे प्रामुख्याने प्रभावीत होत बंद झाले. अन्य कंपन्यांमध्ये शुक्रवारी टायटन आणि टाटा मोटर्सचे समभाग नफाकमाईत राहिले. यासह हिंदुस्थान युनिलिव्हर, मारुती सुझुकी, रिलायन्स इंडस्ट्रीज, एनटीपीसी, नेस्ले, अल्ट्राटेक सिमेंट, टाटा स्टील आणि बजाज फायनान्स यांचे समभाग चमकले आहेत.

नफा वसूली झाल्यामुळे शुक्रवारी आर्थिक व आयटी यांचे समभाग नुकसानीत राहिले आहेत. यासह येत्या सोमवारी तिसऱ्या तिमाहीमधील नफा कमाईचे आकडे सादर करण्यात येणार आहेत. यामुळे गुंतवणूकदार अंतिम सत्रात सावध झाल्याचे दिसून आले. यासह आशिया आणि अमेरिकेमधील बाजारातही घसरण राहिल्याचा परिणाम भारतीय बाजारावर झाला.