नफावसुलीमुळे बाजार अल्पशा घसरणीसह बंद

सेन्सेक्स 64 अंकांनी नुकसानीत : ऑटो निर्देशांक तेजीत

वृत्तसंस्था/ मुंबई

सकाळच्या सत्रामध्ये तेजीत असलेला भारतीय शेअर बाजार दिवसअखेर काहीसा घसरणीसोबत बंद झाला. सेन्सेक्स निर्देशांक 64 अंकांनी घसरणीत राहिला होता. आयटी आणि मेटल समभागांची गुंतवणूकदारांनी खरेदी केली.

सोमवारी आठवड्याच्या पहिल्या दिवशी सरतेशेवटी मुंबई शेअरबाजाराचा 30 समभागांचा सेन्सेक्स निर्देशांक 64 अंकांनी घसरत 85,641 च्या स्तरावर बंद झाला. राष्ट्रीय शेअर बाजाराचा 50 समभागांचा समावेश असलेला निफ्टी निर्देशांक 27 अंकांनी कमी 26,175 अंकांवर बंद झाला. निफ्टी बँक निर्देशांकसुद्धा 71 अंकांनी घसरत 59,681 च्या स्तरावर बंद झाला. याचदरम्यान इंट्राडे दरम्यान सकाळी निफ्टीने 26325 चा सर्वोच्च तर सेन्सेक्सने 86159 चा सर्वोच्च स्तर गाठला होता.

सकाळी शेअर बाजाराची सुरुवात विक्रमी स्तरावर तेजीसह झाली होती. सेन्सेक्स, निफ्टी आणि बँक निफ्टी निर्देशांकांनी सोमवारी सर्वोच्च स्तरावर पोहोचण्यामध्ये यश  मिळवले होते. क्षेत्रांच्या निर्देशांकांची कामगिरी पाहता ऑटो निर्देशांक सर्वाधिक एक टक्का वाढीसोबत बंद झाला. नोव्हेंबरमधील वाहनांच्या विक्रीच्या समाधानकारक आकडेवारीमुळे या कंपन्यांच्या समभागांची गुंतवणूकदारांनी खरेदी केल्याचे पाहायला मिळाले. यासोबतच कमोडिटी, सीपीएसई, आयटी आणि मेटल क्षेत्रांचे निर्देशांक तेजीसोबत बंद झाले तर दुसरीकडे एनर्जी, फायनान्शियल, एफएमसीजी, इन्फ्रा, ऑइल व गॅस,  फार्मा व रिअल्टी क्षेत्राचा निर्देशांक कमकुवत होत बंद झाला.

समभागांची कामगिरी

विविध समभागांच्या कामगिरीकडे पाहता, टाटा मोटर्स पीव्ही, बीईएल, मारुती सुझुकी, एचसीएल टेक, कोटक महिंद्रा बँक, इटर्नल, जेएसडब्ल्यू स्टील, इन्फोसिस, एनटीपीसी, डॉ. रे•ाrज लॅब्ज, कोल इंडिया यांचे समभाग मजबूतीसह बंद झाले.