9 कंपन्यांचे बाजार भांडवल मूल्य 97 हजार कोटींनी वाढ
वृत्तसंस्था/ मुंबई
आघाडीवरच्या 10 कंपन्यांपैकी 9 कंपन्यांचे बाजार भांडवल मूल्य गेल्या आठवड्यामध्ये 97 हजार कोटी रुपयांनी वाढले असल्याचे दिसून आले आहे.गेल्या आठवड्यामध्ये बीएसई सेन्सेक्स 580 अंकांनी वाढत तेजी राखून होता.
या अंतर्गत दहापैकी नऊ कंपन्यांचे बाजार भांडवल मूल्य गेल्या आठवड्यात 97 हजार 463.46 कोटी रुपयांनी वाढले असल्याचे दिसून आले आहे. शेअर बाजारात असलेल्या तेजीचा फायदा कंपन्यांच्या भांडवल मूल्यात तेजी होण्यात दिसून आला. बजाज फायनान्स ही एकमेव कंपनी मागच्या आठवड्यामध्ये नुकसानीत दिसून आली. रिलायन्स इंडस्ट्रीज, एचडीएफसी बँक, आयसीआयसीआय बँक आणि स्टेट बँक ऑफ इंडिया यांनी सर्वाधिक बाजार भांडवल मूल्यामध्ये वाढ नोंदवली आहे. रिलायन्स इंडस्ट्रीच्या बाजार भांडवलामध्ये 36,399 कोटी रुपयांची वाढ होऊन बाजार भांडवल 15,68,995 कोटी रुपयांवर पोहोचले होते. स्टेट बँक ऑफ इंडियाच्या बाजार भांडवल मूल्यामध्ये 15,305 कोटी रुपयांची वाढ होऊन ते 5,15,976 कोटी रुपयांवर पोहोचले होते. आयसीआयसीआय बँकेचे बाजार भांडवल मूल्य मागच्या आठवड्यात 14,749 कोटी रुपयांनी वाढून 6,54,042 कोटी रुपयांवर पोहोचले होते.