चन्नम्मा चौकातील मराठी फलक फाडले

भाषिक तेढ निर्माणाचा प्रयत्न, पोलिसांच्या निव्वळ बघ्याच्या भूमिकेमुळे मराठी भाषिकांतून तीव्र संताप

प्रतिनिधी/ बेळगाव

सरकारी नियमावलीनुसार 60 टक्के कन्नड व 40 टक्के मराठी भाषेचा उल्लेख असलेला बॅनर देखील फाडण्याचे प्रकार शनिवारी चन्नम्मा चौक येथे घडले. कर्नाटक विधिमंडळाच्या अधिवेशनासाठी येणाऱ्या लोकप्रतिनिधींच्या स्वागतासाठी लावलेले फलक फाडण्यात आल्याने कानडी संघटनांचा मराठी द्वेष पुन्हा एकदा दिसून आला. या घडलेल्या प्रकारामुळे मराठी भाषिकांतून तीव्र संताप व्यक्त केला जात आहे.

राणी चन्नम्मा चौक येथे भाजपचे प्रदेश उपाध्यक्ष व माजी आमदार अनिल बेनके व भाजप नेते मुरगेंद्रगौडा पाटील यांनी विरोधी पक्षाच्या स्वागताचे फलक लावले होते. कन्नडसोबत मराठी भाषेतही फलकावर उल्लेख करण्यात आला होता. परंतु, नेहमीच मराठीची काविळ असलेल्या काही कानडी संघटनांकडून शनिवारी स्टंटबाजी करत मराठीत असलेले फलक फाडण्यात आले. विशेष म्हणजे हे कृत्य करत असताना पोलिसांनी मात्र बघ्याची भूमिका घेतली. त्यामुळे पोलिसांच्या कार्यपद्धतीवर प्रश्नचिन्ह उपस्थित होत आहे.