मानुषीला मिळाला नवा चित्रपट

अक्षय कुमारच्या चित्रपटात एंट्री

माजी विश्वसुंदरी अन् अभिनेत्री मानुषी छिल्लरने अक्षय कुमारचा चित्रपट सम्राट पृथ्वीराजमधून बॉलिवूडमध्ये पदार्पण केले होते. या चित्रपटात मानुषी अन् अक्षयसह संजय दत्त तसेच सोनू सूदही महत्त्वाच्या भूमिकेत होता. हा चित्रपट फारसा चालला नव्हता. मानुषी आता पुन्हा एकदा अक्षय कुमारसोबत एका चित्रपटात दिसून येणार आहे.

मानुषीची अक्षय कुमारचा आगामी चित्रपट ‘बडे मियां छोटे मियां’मध्ये वर्णी लागली आहे. मानुषी आता या चित्रपटात मुख्य नायिका म्हणून भूमिका साकारणार आहे. मानुषीपूर्वी या चित्रपटासाटी करिना कपूरचे नाव चर्चेत होते. परंतु मानुषीला आता हा चित्रपट मिळाल्याचे समजते. मानुषीच्या एंट्रीबद्दल निर्मात्यांकडून अद्याप अधिकृत घोषणा करण्यात आलेली नाही.

अक्षय कुमार, टायगर श्रॉफच्या या चित्रपटात तीन अभिनेत्री दिसून येणार आहेत. या चित्रपटाचे लवकरच चित्रिकरण सुरू होणार आहे. बडे मियां छोटे मियां या चित्रपटाचे दिग्दर्शन अली अब्बास जफर करणार आहे. तर दीपशिका देशमुख आणि जॅकी भगनानी यांच्याकडून या चित्रपटाची निर्मिती केली जाणार आहे. मानुषी याचबरोबर ‘तेहरान’ या चित्रपटात जॉन अब्राहमसोबत दिसून येणार आहे.