उत्पादन क्षेत्राचा पीएमआय घसरला

मात्र नवीन रोजगार व निर्यातीमध्ये वाढ नोंदवली

वृत्तसंस्था/ नवी दिल्ली

जुलैमध्ये भारताच्या उत्पादन पीएमआयमध्ये काहीशी नरमाई दिसून आली. एका खासगी एजन्सीने जाहीर केलेल्या सर्वेक्षणानुसार, नवीन ऑर्डरची मागणी आणि उत्पादनातील कमी वाढीमुळे उत्पादन पीएमआयवर प्रतिकूल परिणाम झाला. एचएसबीसी इंडिया मॅन्युफॅक्चरिंग पर्चेसिंग मॅनेजर्स इंडेक्स (पीएमआय) जूनमधील 58.3 वरून जुलैमध्ये 58.1 वर पोहोचला. हा निर्देशांक एस अॅण्ड पी ग्लोबलने संकलित केला आहे.

हा निर्देशांक जुलै 2021 पासून सातत्याने 50-पॉइंट पातळीच्या वर आहे. जर हा निर्देशांक 50 च्या वर असेल तर त्याचा अर्थ वाढ आणि जर निर्देशांक 50 च्या खाली असेल तर उत्पादनात घट झाली आहे असे मानले जाते.

एचएसबीसीचे चीफ इंडिया इकॉनॉमिस्ट प्रांजुल भंडारी म्हणाले, ‘जुलैमध्ये भारताच्या उत्पादन पीएमआय वाढीत थोडीशी मंदी होती. तथापि, बहुतेक घटक मजबूत राहिले आहेत आणि ही थोडीशी घसरण चिंतेचे कारण नाही.’

आर्थिक वर्ष 24 च्या दुसऱ्या तिमाहीत उत्पादनाचे प्रमाण लक्षणीयरीत्या वाढले, परंतु जूनमध्ये वाढ मंदावली असल्याचे सर्वेक्षणात नमूद करण्यात आले आहे. मॅन्युफॅक्चरिंग पीएमआय निर्देशांक मार्च 2005 पासून जारी करण्यात आला आहे आणि तो त्याच्या स्थापनेपासून सरासरीपेक्षा सहा टक्के जास्त आहे.