मनीष सिसोदिया 19 जानेवारीपर्यंत न्यायालयीन कोठडीत

दिल्ली अबकारी घोटाळ्याप्रकरणी आरोपी

वृत्तसंस्था/ नवी दिल्ली

दिल्ली अबकारी घोटाळ्याप्रकरणी अटकेत असलेले आप नेते मनीष सिसोदिया यांना आणखी काही दिवस तुरुंगातच रहावे लागणार आहे. घोटाळ्याशी निगडित सीबीआय प्रकरणी राउज अॅव्हेन्यू न्यायालयाने सिसोदियांची न्यायालयीन कोठडी 19 जानेवारीपर्यंत वाढविली आहे. यामुळे सिसोदिया यांना तुरुंगातच नववर्ष साजरे करावे लागणार आहे.

न्यायालयाने सीबीआयकडून दाखल आरोपपत्राची दखल घेत सुनावणी केली आहे. दिल्ली अबकारी घोटाळ्याप्रकरणी आरोपींच्या वतीने आरोपपत्रातील दस्तऐवजांची पडताळणी करण्यासाठी 15 जानेवारीपर्यंतची मुदत न्यायालयाने दिली आहे. आरोपपत्राशी संबंधित सर्व दस्तऐवज सर्व आरोपींना देण्यात आल्याची माहिती सीबीआयने सुनावणीवेळी दिली होती. आप नेते सिसोदिया यांना फेब्रुवारी महिन्यात सीबीआयने अटक केली होती. त्यापूर्वी ते अरविंद केजरीवाल सरकारमध्ये उपमुख्यमंत्री होते.