मणिपूर, हरियाणा उपांत्यपूर्व फेरीत

वृत्तसंस्था / चेन्नई

हॉकी इंडियाच्या येथे सुरू असलेल्या वरिष्ठ पुरुषांच्या राष्ट्रीय हॉकी चॅम्पियनशीप स्पर्धेत मणिपूर आणि हरियाणा संघांनी उपांत्यपूर्व फेरीत प्रवेश मिळविला.

सोमवारी झालेल्या च गटातील शेवटच्या सामन्यात मणिपूरने आसामचा 10-0 अशा गोल फरकाने एकतर्फी पराभव केला. या सामन्यात मणिपूरच्या लेशराम दिपुसिंगने शानदार हॅट्ट्रीक नोंदविली. दुसऱ्या एका सामन्यात हरियाणाने मिझोरामचे आव्हान 8-0 असे संपुष्टात आणले. हरियाणाच्या रोहीतने 4 गोल केले. दादरा-नागर हावेली आणि दमन-दिव्य हॉकी संघाने अ गटातून उपांत्यपूर्व फेरीत प्रवेश मिळविताना छत्तीसगडचा 3-1 असा पराभव केला. मणिपूर आणि पंजाब यांच्यात पहिला उपांत्यपूर्व फेरीचा सामना होईल. त्यानंतर हरियाणा आणि महाराष्ट्र, तामिळनाडू आणि उत्तरप्रदेश, ओदिशा आणि कर्नाटक यांच्यात उपांत्यपूर्व फेरीच्या लढती होतील.