ममता बॅनर्जी यांचे जोरदार शक्तिप्रदर्शन

भवानीपूर मतदारसंघातून उमेदवारी अर्ज दाखल : भाजपचे सुवेंदू अधिकारी यांच्याशी होणार लढत मनाई

वृत्तसंस्था/ कोलकाता

पश्चिम बंगालच्या मुख्यमंत्री ममता बॅनर्जी यांनी बुधवारी भवानीपूर विधानसभा जागेसाठी तृणमूल काँग्रेसच्या उमेदवार म्हणून आपला उमेदवारी अर्ज दाखल केला. याप्रसंगी त्यांनी जोरदार शक्तिप्रदर्शन केले. ‘ममता बॅनर्जी जिंदाबाद’ आणि ‘तृणमूल काँग्रेस जिंदाबाद’च्या घोषणा देणाऱ्या समर्थकांच्या गर्दीत, बॅनर्जी यांनी आपल्या कालीघाट येथील निवासस्थानापासून अलिपूर सर्वे बिल्डिंगपर्यंत रोडशो काढला. त्यानंतर त्यांनी अलिपूर सर्वे बिल्डिंगमधील निवडणूक कार्यालयात आपला उमेदवारी अर्ज दाखल केला.

आपल्या पूर्वनियोजित कार्यक्रमानुसार, तृणमूलच्या सर्वेसर्वा ममता बॅनर्जी सकाळी सुमारे 10:25 वाजता हरीश चॅटर्जी स्ट्रीटवरील आपल्या घरातून पायी निघाल्या. याप्रसंगी आपल्या ‘घरातील कन्येला’ आपल्याच परिसरातून जाताना पाहण्यासाठी उत्सुक असलेल्या असंख्य लोकांनी भवानीपूरचे रस्ते गजबजले होते. प्रचंड उत्साह आणि जल्लोषात, तृणमूल कार्यकर्ते आणि समर्थकांसोबतच अनेक सामान्य लोकांनीही मुख्यमंत्र्यांच्या उमेदवारी अर्ज भरण्याच्या मिरवणुकीत स्वेच्छेने सहभाग घेतला.

उमेदवारी अर्ज दाखल करताना एक अनोखे आणि विशेष दृश्य पाहायला मिळाले. समाजातील सर्व घटकांना आणि सर्व धर्मांच्या लोकांना एक सशक्त धर्मनिरपेक्ष संदेश देण्यासाठी, मुख्यमंत्र्यांसोबत विविध भाषिक आणि जातीय पार्श्वभूमीचे प्रतिनिधी होते. उमेदवारी अर्ज सादर करताना त्यांच्यासोबत राज्यमंत्री फिरहाद हकीम यांच्या पत्नी इस्मत हकीम, पंजाबी समाजाचे निर्माते निस्पाल सिंग आणि गुजराती समाजाचे एक प्रतिनिधी होते.

उमेदवारी अर्ज दाखल केल्यानंतर बॅनर्जी पत्रकारांना म्हणाल्या, ‘माझा जन्म आणि संगोपन इथेच भवानीपूरमध्ये झाले. माझ्या आयुष्यातील प्रत्येक गोष्ट इथेच सुरू झाली.’ तसेच भवानीपूरसह प्रत्येक जागेवर तृणमूल काँग्रेसला मते देण्याचे आवाहनही त्यांनी केले. ‘मी केवळ भवानीपूरच्याच नव्हे, तर सर्व 294 मतदारसंघांतील जनतेला आवाहन करते की, त्यांनी आमच्या उमेदवारांचा विजय निश्चित करावा. आम्ही मोठ्या जनादेशाने जिंकू.’ असे त्या म्हणाल्या. 2021 च्या विधानसभा निवडणुकीत तृणमूल काँग्रेसने 213 जागा जिंकल्या होत्या.