कोल्हापूरात 'महाडिक पॅटर्न' हिट
कोल्हापूर :
कोल्हापूर दक्षिण विधानसभा मतदारसंघात भाजपचे उमेदवार अमल महाडिक यांनी काँग्रेसचे उमेदवार ऋतुराज पाटील यांच्यावर दणदणीत विजय मिळवला आहे. त्यामुळं आता कोल्हापुरात 'महाडिक पॅटर्न' चालणार हे आता निश्चित झालं आहे.
दक्षिण विधानसभा मतदारसंघाच्या विजयासाठी भाजप आणि काँग्रेस दोघांनीही कंबर कसली होती. या मतदारसंघातून ११ उमेदवार जरी रिंगणात असले, तरी मुख्य लढत ही भारतीय जनता पक्षाचे अमल महाडिक आणि काँग्रेसचे ऋतुराज पाटील यांच्यातच होती.
दरम्यान, खासदार धनंजय महाडिक यांना महाविकास आघाडीकडून मोठ्या प्रमाणामध्ये टार्गेट करण्यात आलं होतं. त्यामुळे त्याचा फटका अमल महाडिक यांना विधानसभा निवडणुकीमध्ये बसणार का? याची चर्चा रंगली होती. मात्र, कोल्हापूर दक्षिणमध्ये त्याचा कोणताही परिणाम झाला नसल्याचे निकालातून स्पष्ट झालं आहे. अमल महाडिक यांनी पुन्हा एकदा विजय खेचून आणला आहे. त्यांच्या शाहुपुरीतील संपर्क कार्यालयासमोर समर्थकांनी गुलाल उधळत जल्लोषाला सुरूवात केली आहे.