माडखोल पावणाई रवळनाथ देवस्थानचा जत्रोत्सव उद्या

ओटवणे । प्रतिनिधी

माडखोल गावचे ग्रामदैवत श्री पावणाई रवळनाथ देवस्थानचा वार्षिक जत्रोत्सव शनिवारी १५ नोव्हेंबर रोजी होणार आहे. नवसाला पावणारा रवळनाथ आणि माहेरवाशिणीची पाठीराखी अशी पावणाई देवीची ख्याती असल्याने या जत्रोत्सवासाठी भाविकांची अलोट गर्दी होते.यानिमित्त मंदिरात सकाळी धार्मिक कार्यक्रम आटोपल्यानंतर पावणाई रवळनाथ काळकाई देवतांना भरजरी वस्त्र व सुवर्ण अलंकारांसह आकर्षक फुलांनी सजविण्यात येणार आहे. या दिवशी या देवस्थानच्या मानकऱ्यांच्या उपस्थितीत देवीची मानाची ओटी भरल्यानंतर देवीच्या दर्शनासाठी रात्री उशिरापर्यंत भाविकांची गर्दी होणार आहे. यानिमित्त रात्री सवाद्य पालखी मिरवणूकीनंतर उशिरा आरोलकर दशावतार कंपनीचे नाटक होणार आहे.भाविकांनी देवतांचे दर्शन आणि आशीर्वाद घ्यावा असे आवाहन देवस्थानचे मानकरी, स्थानिक देवस्थान कमिटी आणि माडखोल ग्रामस्थांनी केले आहे.