एसीसीमधील हिस्सेदारी ‘एलआयसी’ने वाढविली

वृत्तसंस्था/ मुंबई

भारतीय जीवन विमा महामंडळ (एलआयसी) ने अदानी समूहाची सिमेंट कंपनी एसीसी लिमिटेडमधील हिस्सेदारी 10 टक्केपेक्षा अधिक वाढवली आहे. एलआयसीने खुल्या बाजारातून एसीसीचे 3.7 दशलक्ष पेक्षा जास्त समभाग खरेदी केले आहेत. तसेच, एलआयसीने सार्वजनिक क्षेत्रातील स्टॉक एनबीसीसी इंडियामधील हिस्सेदारी 4.5 टक्केपर्यंत वाढवली आहे. ही खरेदी अलीकडच्या काही महिन्यांत करण्यात आली आहे. एलआयसीच्या या पावलाने शेअर बाजारातील गुंतवणूकदारांचे लक्ष वेधून घेतले आहे.  एसीसीचे शेअर्स शुक्रवारी 1.13 ने घसरून 1,849 च्या आसपास व्यवहार करत आहेत. दरम्यान, एनबीसीसीचा शेअर 0.19 टक्क्यांनी घसरून 117.20 वर व्यवहार करत आहे.

एलआयसीने हिस्सेदारी कशी वाढवली

एलआयसीने एसीसी लिमिटेडमधील आपली हिस्सेदारी 8.58 वरून 10.59 टक्केपर्यंत वाढवली. हे साध्य करण्यासाठी, कंपनीने 20 मे 2025 ते 25 नोव्हेंबर 2025 दरम्यान 37,82,029 इक्विटी शेअर्स खरेदी केले, जे कंपनीच्या एकूण इक्विटीच्या 2.01 टक्के होते.  पूर्वी, एलआयसीकडे 1,61,15,035 शेअर्स होते, जे आता 1,98,97,064 पर्यंत वाढले आहेत. एलआयसीने आपल्या नियामक फाइलिंगमध्ये स्पष्टपणे म्हटले आहे की ही गुंतवणूक बाजार खरेदीद्वारे करण्यात आली होती.

एसीसीचा शेअर वर्षात 15 टक्क्यांनी घसरला

अदानी समूहाची आघाडीची सिमेंट कंपनी असलेल्या एसीसीचे बांधकाम आणि पायाभूत सुविधा क्षेत्रात मजबूत स्थान आहे. तथापि, गेल्या वर्षी तिचा शेअर 15 टक्के पेक्षा जास्त आणि सहा महिन्यांत 3 टक्क्यांनी घसरला आहे. तीन महिन्यांत तो 3 टक्क्यांनी वाढला पण गेल्या महिन्यात स्थिर राहिला. पाच वर्षांचा परतावा 9 टक्के आहे. कंपनीचे बाजारमूल्य 35,000 कोटी रुपयांवर आहे.

एलआयसीने एनबीसीसीमध्ये  केले शेअर्स खरेदी

एलआयसीने 25 एप्रिल 2018 ते 24 नोव्हेंबर 2025 दरम्यान एनबीसीसी इंडियामध्ये 3,024,672 शेअर्स खरेदी केले, जे 2.07 टक्के  होते.