‘जुनं फर्निचर’ चित्रपटात दिग्गज कलाकार

चित्रपटाचे पोस्टर प्रदर्शित

‘जुनं फर्निचर’ हा चित्रपट येत्या 26 एप्रिल रोजी प्रदर्शित होणार आहे. या चित्रपटाचा टीजर यापूर्वीच सादर करण्यात आला आहे. या टीजरमध्ये महेश मांजरेकर यांच्या करारी व्यक्तिरेखेची झलक दिसुन आली आहे. आता या चित्रपटातील अन्य कलाकारांची नावे समोर आली आहेत. तसेच त्यांचा लुक सादर करण्यात आला आहे. चित्रपटाचे एक पोस्टर सोशल मीडियावर शेअर करण्यात आले आहे.

या पोस्टरमध्ये महेश मांजरेकर यांच्यासोबत मेधा मांजरेकर, उपेंद्र लिमये, भूषण प्रधान, अनुषा दांडेकर आणि सचिन खेडेकर दिसून येत आहेत. पोस्टरमध्ये न्यायालय, न्यायाधीश आणि काही कागदपत्रेही दिसत आहेत, ज्यावर न्याय, हक्क, कायदा असे नमूद आहे, यामुळे आता ही कोणती लढाई लढली जाणार याचे उत्तर प्रेक्षकांना चित्रपट पाहिल्यावरच मिळणार आहे.

चित्रपटात समीर धर्माधिकारी, डॉ. गिरीश ओक, विजय निकम, संतोष मिजगर, अलका परब, शरद पोंक्षे यांच्याही महत्त्वाच्या भूमिका आहेत. चित्रपटात ओंकार भोजने, शिवाजी साटम यांचीही झलक दिसून येणार आहे. या चित्रपटाची कथा, पटकथा, संवाद, दिग्दर्शक महेश मांजरेकर यांनीच केले आहे.

जुन्या फर्निचरमध्ये किती ताकद असते, हे दाखविण्याचा प्रयत्न या चित्रपटातून करण्यात आला आहे. एका ज्येष्ठ नागरिकाचा लढा यात दाखविण्यात येणार आहे. अनेक ज्येष्ठ नागरिक  अशा प्रकारच्या स्थितीला सामोरे जात असतील. प्रत्येक तरुणाने आपल्या पालकांसोबत हा चित्रपट पहावा असे महेश मांजरेकर यांनी म्हटले आहे.