रेडी यशवंतगडावर व्यसनमुक्त गड संवर्धन मोहिमेचा शुभारंभ

मान्यवरांच्या उपस्थितीत विविध कार्यक्रमांचे आयोजन

ओटवणे | प्रतिनिधी

रेडी येथील किल्ले यशवंतगडावर वेंगुर्ला पोलीस निरीक्षक निसर्ग ओतारी व गट विकास अधिकारी वासुदेव नाईक यांच्या उपस्थितीत व्यसनमुक्तीचे सूचना फलक उभारून ' व्यसनमुक्त गड संवर्धन मोहिमेचा' शुभारंभ करण्यात आला. यावेळी नशाबंदी मंडळाचे मासिक कल्याणयात्रा- व्यसनमुक्तीच्या गाथा चे प्रकाशन गटविकास अधिकारी वासुदेव नाईक व पोलीस निरीक्षक निसर्ग ओतारी यांच्याहस्ते करण्यात आले.यावेळी नशाबंदी मंडळ महाराष्ट्र राज्याचे राज्य संघटक व सचिव अमोल मडामे, रेडीचे सरपंच रामसिंग राणे, रेडी उपसरपंच आनंद भिसे, माजी जिल्हा सभापती अजित सावंत, त्याचबरोबर आरवली गावचे सरपंच समीर कांबळी, दुर्ग रक्षक प्रतिष्ठानचे नारायण तेंडुलकर, भूषण मांजरेकर, राजाराम चिपकर, अनसा भगत, दुर्ग मावळा प्रतिष्ठानचे समिल नाईक, उत्कर्षा वेंगुर्लेकर, ज्ञानेश्वर राणे, रोहन राऊळ, साईप्रसाद मसगे, केशव ठाकूर, वेदांत वेंगुर्लेकर, गणेश नाईक तसेच नशाबंदी मंडळाचे अमोल मडामे, दिशा कळंबे, मिलिंद पाटील, चेतना सावंत आदी उपस्थित होते.यावेळी गटविकास अधिकारी वासुदेव नाईक यांनी या उपक्रमात सहभागी झालो याचा आपल्याला विशेष आनंद झाल्याचे सांगून या उपक्रमामुळे तरुण पिढी घडणार आहे असल्याचे सांगितले. पोलीस निरीक्षक निसर्ग ओतारी यांनी त्यांच्या मार्गदर्शनपर भाषणाची सुरुवात व्यसनमुक्तीपर कवितेने करून या उपक्रमाचे कौतुक केले आणि या उपक्रमास सर्वतोपरी सहकार्य करण्याचे आश्वासन दिले. तसेच व्यसनांमुळे होणारे अत्याचार बलात्कार व गुन्हेगारी याचा उल्लेख करून व्यसनांपासून दूर राहणे किती आवश्यक आहे, हे सांगून उपस्थित जनसमूहाला व्यसनमुक्तीची शपथ दिली. यावेळी नशाबंदी मंडळाचे राज्य संघटक व सचिव अमोल मडामे यांनी शिवाजी महाराज व व्यसनमुक्ती या विषयावर आपले विचार व्यक्त करून व्यसनमुक्त गड किल्ले संवर्धन मोहिम राबविण्यामागील शिवाजी महाराजांचे शौर्य, त्याग आणि संस्कार विशद केले. दुर्गरक्षक प्रतिष्ठान चे सचिव भूषण मांजरेकर ह्यांनी यशवंतगडावर केलेल्या ह्या शुभारंभचे खरी गरज व कारणे, तसेच गडाला लागून असलेल्या व्यावसायिक बेकायदेशीर बांधकामामुळे गडावर ह्या व्यसनांची सुरुवात होण्याची भीती व शक्यता व्यक्त करुन त्या संबंधित शासकीय यंत्रणा व समस्त शिवप्रेमीनीं सजग राहून ह्या गोष्टी वेळीच रोखणे आवश्यक असल्याचे प्रखर मत मांडले.यावेळी उपस्थित इतर मान्यवरांनी या उपक्रमाची आवश्यकता व महत्त्व उपस्थितांना सांगून या मोहिमेत आम्ही पूर्ण ताकदीनिशी सहभागी होऊ असा शब्द दिला. या कार्यक्रमात इतिहास अभ्यासक ज्ञानेश्वर राणे यांच्यावतीने व्यसनमुक्ती वरील पोस्टर आणि ऐतिहासिक शस्त्रे, इतिहासाची विविध साधने, तलवार, राज्यशस्त्र दांडपट्टा, कट्यार, जिरेटोप, वाघनखें, तिरकमान, जुनी नाणी, संदर्भ ग्रंथाचे प्रदर्शन आयोजित करण्यात आले होते. तसेच व्यसनमुक्तीची साप सिडी या खेळाचे ही आयोजन करण्यात आले होते. तसेच शिरोडा खर्डेवाडी प्राथमिक शाळेच्या विद्यार्थ्यांनी पथनाट्य सादर केले. याला उत्स्फूर्त प्रतिसाद लाभला.या उपक्रमात नशाबंदी मंडळ महाराष्ट्र राज्य मुंबई, नशामुक्त भारत अभियान टीम, जिल्हा परिषद समाज कल्याण विभाग सिंधुदुर्ग, जिल्हा पोलीस यंत्रणा, वाहतूक पोलीस यंत्रणा, दुर्ग मावळा प्रतिष्ठान सिंधुदुर्ग आणि दुर्ग रक्षक प्रतिष्ठान रेडी, पूर्ण प्राथमिक शाळा शिरोडा खर्डेवाडी, माऊली विद्या मंदिर रेडी, जिल्हा तंबाखू नियंत्रण विभाग, सर्व पोलीस पाटील, आरोग्य व आशा स्वयंसेविका, अंगणवाडी सेविका, महिला बचतगट, विद्यार्थी, शिक्षक, ग्रामस्थ व शिवप्रेमी इत्यादी संस्थांनी आपला सहभाग घेतला.सिंधुदुर्ग जिल्हा संघटक अर्पिता मुंबरकर यांनी कार्यक्रमाच्या प्रास्ताविकात अमली पदार्थ विरोधी मोहिमेला गडचिरोलीतील डॉ अभय बंग यांच्या मुक्तीपथ सारखे जनआंदोलनाचे स्वरूप देण्याचे उद्दिष्ट असून आजचा कार्यक्रम म्हणजे त्यासाठी उचललेले एक पाऊल असल्याचे सांगितले. कार्यक्रमाचे सूत्रसंचालन दर्शना पाताडे यांनी तर आभार प्रदर्शन दुर्ग मावळा प्रतिष्ठानचे कोकण विभाग अध्यक्ष गणेश नाईक यांनी मानले.