हैदराबादमध्ये सर्वात मोठे एआय केंद्र उभारणार

टीसीएसचे हायपरवॉल्ट 70 हजार कोटी रुपयांची गुंतवणूक करणार

वृत्तसंस्था, नवी दिल्ली

भारतातील सर्वात मोठे एआय डेटा सेंटर कॅम्पस हैदराबादमध्ये उभारले जाणार आहे. हे कॅम्पस टाटा ग्रुप आणि टाटा कन्सल्टन्सी सर्व्हिसेसची उपकंपनी असलेल्या हायपरवॉल्ट एआय डेटा सेंटर लिमिटेडद्वारे उभारण्यात येणार असल्याची माहिती आहे. या केंद्राची क्षमता 1 गिगावॅट असेल, जे मोठ्या एआय तंत्रज्ञानाचे संचालन आणि व्यवस्थापन करण्यासाठी उपयुक्त ठरणार असल्याचेही यावेळी नमूद केले आहे.

कंपनी आणि तिचे भागीदार या संपूर्ण पायाभूत सुविधांवर सुमारे 70,000 कोटी रुपयांची गुंतवणूक करणार आहेत. टीसीएसने शेअर बाजाराला दिलेल्या माहितीनुसार, या मेगा प्रोजेक्टसाठी हैदराबादमध्ये 264 एकर जमीन निश्चित करण्यात आली आहे. हा प्रकल्प वेगवेगळ्या टप्प्यांमध्ये तयार केला जाईल.

सर्वात प्रगत एआय पायाभूत सुविधांचे कॅम्पस होणार

कंपनीच्या मते, बांधकामानंतर हे भारतातील सर्वात मोठे आणि सर्वात आधुनिक एआय केंद्र असेल. जगातील मोठ्या टेक कंपन्या आणि एआय स्टार्टअप्सच्या गरजा लक्षात घेऊन हे केंद्र उभारले जात आहे. येथे, हेवी एआय मॉडेल्स तयार करण्यासाठी (ट्रेनिंगसाठी), ते चालवण्यासाठी आणि हाय-स्पीड प्रोसेसिंगसाठी सुपर-फास्ट ग्राफिक्स कार्ड्सचा वापर केला जाईल.

हजारो नोकऱ्या निर्माण होतील

याव्यतिरिक्त, टीसीएसने म्हटले आहे की, हा प्रकल्प वीज, शीतकरण, नेटवर्किंग, बांधकाम, अभियांत्रिकी आणि संचालन या क्षेत्रांमधील भारताच्या एआय पायाभूत सुविधांच्या परिसंस्थेला चालना देऊ शकतो. या प्रकल्पामुळे या प्रदेशात हजारो प्रत्यक्ष आणि अप्रत्यक्ष रोजगार निर्माण होतील. हे एआय केंद्र पूर्णपणे पर्यावरणपूरक असेल. ते सौर-पवन उर्जेसारख्या हरित उर्जेचा वापर करेल आणि पाण्याची कोणतीही नासाडी होणार नाही. या प्रकल्पामुळे स्थानिक लोकांना हजारो नोकऱ्या मिळतील आणि वीज, नेटवर्किंग, बांधकाम आणि अभियांत्रिकी यांसारख्या क्षेत्रांतील व्यवसायांना फायदा होईल.

सुपरफास्ट कूलिंग्ग, नेटवर्किंग तंत्रज्ञान

हायपरवॉल्टचे सीईओ, दीपेश किरण नंदा म्हणाले की, भविष्यातील तंत्रज्ञान लक्षात घेऊन हे केंद्र उभारले जात आहे. हेवी-ड्यूटी कंप्युटिंग आणि प्रोसेसर थंड ठेवण्यासाठी प्रगत लिक्विड कूलिंग आणि डायरेक्ट-टू-चिप कूलिंग तंत्रज्ञानाचा वापर केला जाईल. तसेच, हाय-स्पीड इंटरनेट आणि पॉवर मॅनेजमेंट सिस्टीममुळे डेटा सेंटरचे काम कोणत्याही व्यत्ययाशिवाय अधिक वेगाने पूर्ण होईल.

माहिती तंत्रज्ञान आणि उद्योग मंत्री डी. श्रीधर बाबू म्हणाले, ‘या वर्षी जानेवारीमध्ये दावोस येथे माननीय मुख्यमंत्री आणि टाटा सन्सचे अध्यक्ष एन. चंद्रशेखरन यांच्यात झालेल्या संभाषणातून या कराराची सुरुवात झाली. तेव्हापासून, काही महिन्यांतच, अधिकारी आणि हायपरव्हॉल्ट व टीसीएसमधील आमच्या मित्रांनी हे प्रत्यक्षात आणण्यासाठी विचारांच्या वेगाने पावले उचलली आहेत,’ असे ते म्हणाले.  टीसीएसचे सीईओ आणि एमडी के. कृतीवासन म्हणाले, ‘हायपरव्हॉल्ट आमच्या क्लाउड, अभियांत्रिकी, एंटरप्राइझ ट्रान्सफॉर्मेशन आणि एआय क्षमतांसोबत एआय-सज्ज पायाभूत सुविधा एकत्र आणून टीसीएसच्या ‘इन्फ्रास्ट्रक्चर-टू-इंटेलिजन्स’ धोरणाला पुढे नेते. हैदराबाद जागतिक ग्राहकांना सेवा देण्यासाठी आवश्यक व्याप्ती, प्रतिभा आणि परिसंस्था प्रदान करते.’