लंकेची बांगलादेशवर 211 धावांची आघाडी
फर्नांडो, रजिता, कुमारा यांची प्रभावी गोलंदाजी, लंका दु. डाव 5 बाद 119
वृत्तसंस्था/ सिलेत
यजमान बांगलादेश आणि लंका यांच्यात येथे सुरू असलेल्या दोन सामन्यांच्या कसोटी मालिकेतील पहिल्या सामन्यात शनिवारी खेळाच्या दुसऱ्या दिवसाअखेर लंकेने दुसऱ्या डावात 5 बाद 119 धावा जमवित बांगलादेशवर एकूण 211 धावांची आघाडी मिळवली आहे. बांगलादेशचा पहिला डाव 188 धावात आटोपल्यानंतर लंकेने पहिल्या डावात 92 धावांची बढत मिळवली. या सामन्यातील खेळाचा दुसरा दिवस पुन्हा गोलंदाजांनी गाजवताना 12 गडी बाद केले.
या सामन्यात लंकेचा पहिला डाव 280 धावात आटोपल्यानंतर बांगलादेशने 3 बाद 32 या धावसंख्येवरून खेळाला पुढे सुरुवात केली आणि त्यांचा प. डाव 51.3 षटकात 188 धावात आटोपला. बांगलादेशच्या पहिल्या डावात ताजुल इस्लामने सर्वाधिक म्हणजे 6 चौकारासह 47 धावा जमवल्या. लिटॉन दासने 4 चौकारांसह 25, शहदात हुसेनने 3 चौकारांसह 18, मेहदी हसन मिराजने 1 चौकारांसह 11, शोरीफुल इस्लामने 2 षटकारासह 15, खलिल अहमदने 2 षटकार आणि 1 चौकारांसह 22 धावा जमवल्या. लंकेच्या अचूक गोलंदाजीसमोर बांगलादेशचे फलंदाज ठराविक अंतराने बाद झाले. लंकेतर्फे विश्वा फर्नांडोने 48 धावात 4 तर रजिताने 56 धावात 3 तसेच कुमाराने 31 धावात 3 गडी बाद केले.
पहिल्या डावात 92 धावांची आघाडी घेणाऱ्या लंकेने आपल्या दुसऱ्या डावाला सुरुवात केली पण दिवसअखेर त्यांनी दुसऱ्या डावात 35 षटकात 5 बाद 119 धावा जमवल्या. सलामीच्या करुणारत्नेने एकाकी लढत देत 101 चेंडूत 1 षटकार आणि 7 चौकारांसह 52 धावा जमवल्या. सलामीचा मधुष्का 1 चौकारांसह 10 धावावर बाद झाला. कुशल मेंडिसने 3 धावा केल्या. अँजेलो मॅथ्यूजने 3 चौकारांसह 22 धावा जमवल्या. चंडिमलला आपले खाते उघडता आले नाही. कर्णधार धनंजय डिसिल्वा 3 चौकारांसह 23 धावावर तर विश्वा फर्नांडो 2 धावावर खेळत आहे. बांगलादेशतर्फे नाहीद राणाने 2 तर एस. इस्लाम, टी. इस्लाम आणि मेहदी हसन मिराज यांनी प्रत्येकी एक गडी बाद केला.
संक्षिप्त धावफलक : लंका प. डाव सर्वबाद 280, बांगलादेश प. डाव 51.3 षटकात सर्वबाद 188 (ताजुल इस्लाम 47, शहदात हुसेन 18, लिटॉन दास 25, मेहदी हसन 11, एस. इस्लाम 15, खलिद अहमद 22, मेहमुदुल हसन जॉय 12, अवांतर 19, विश्वा फर्नांडो 4-48, रजिता 3-56, कुमारा 3-31), लंका दु. डाव 36 षटकात 5 बाद 119 (मधुष्का 10, करुणारत्ने 52, कुशल मेंडिस 3, मॅथ्यूज 22, चंडिमल 0, धनंजय डिसिल्वा खेळत आहे 23, व्ही. फर्नांडो खेळत आहे 2, अवांतर 7, नाहीद राणा 2-42, एस. इस्लाम, टी. इस्लाम आणि मेहदी हसन मिराज प्रत्येकी एक बळी).