कोगेत होणार कुस्तीचे जंगी मैदान ! सिकंदर शेख, रोशनसिंग आणि पृथ्वीराज पाटिल यांचे आकर्षण

कसबा बीड / वार्ताहर

कोगे तालुका करवीर येथे 6 जानेवारी रोजी कुंभी कासारी साखर कारखाना माजी उपाध्यक्ष कै. प्रकाशराव कुंडलीक पाटील यांच्या प्रथम स्मृतिदिनानिमित्त जंगी कुस्ती मैदान स्पर्धा आयोजीत केली आहे. हे कुस्ती मैदान कै. एम.एस. पाटील ( बळी वस्ताद ) आखाडा, पाटील माळ येथे शनिवारी दुपारी 4 वाजता सुरू होणार आहे. अशी माहिती या जंगी कुस्ती मैदानाचे आयोजक कुंभी कासारी साखर कारखान्याचे व्हा. चेअरमन विश्वास पाटील यांनी दिली.

या मैदानाचे प्रमुख आकर्षण असलेल्या कुस्त्यामध्ये कोगे गावचे सुपुत्र व गंगावेश तालमीचे वस्ताद विश्वास हारुगले यांचा पट्टा महाराष्ट्र केसरी सिकंदर शेख विरुद्ध महान भारत केसरी रोशनसिंग , महाराष्ट्रू केसरी पृथ्वीराज पाटील विरुद्ध मुंबई महापौर केसरी भारत मदने, संग्राम पाटील ( सेनादल ) विरुद्ध भैरू माने ( गंगावेश तालीम ) तसेच 100 हून अधिक लहान मोठ्या चटकदार कुस्त्या होणार आहेत.