किरण जॉर्जचे आव्हान समाप्त

वृत्तसंस्था / इकसेन सिटी (कोरिया)

विश्व बॅडमिंटन संघटनेच्या येथे सुरू असलेल्या कोरिया मास्टर्स 300 दर्जाच्या आंतरराष्ट्रीय बॅडमिंटन स्पर्धेत भारताच्या किरण जॉर्जचे पुरुष एकेरीतील आव्हान उपांत्य फेरीत समाप्त झाले. थायलंडच्या कुनालवेट व्हिटीडेसमने त्याचा पराभव करत अंतिम फेरीत प्रवेश मिळविला.

शनिवारी झालेल्या पुरुष एकेरीच्या उपांत्य सामन्यात थायलंडच्या पाचव्या मानांकित व्हिटीडेसमने 41 व्या मानांकित किरण जॉर्जचा 21-12, 22-20 अशा सरळ गेम्समध्ये फडशा पाडत अंतिम फेरीत प्रवेश मिळविला. किरण जॉर्ज प्रकाश पदुकोन बॅडमिंटन अकादमीमध्ये सराव करीत आहे. किरणच्या पराभवामुळे या स्पर्धेतील भारताचे आव्हान संपुष्टात आले. उपांत्य फेरीच्या सामन्यात व्हिटीडेसमने आपल्या स्मॅश फटक्यावर पहिला गेम 21-12 असा जिंकला. पण त्यानंतर दुसऱ्या गेममध्ये किरण जॉर्जने त्याला कडवी लढत दिली. पण त्याला आपला पराभव टाळता आला नाही.