कनिका कपूर लंडनमध्ये विवाहबद्ध

गौतमसोबत नव्या नात्यात गायिका

लोकप्रिय गायिका कनिका कपूर विवाहबंधनात अडकली आहे. गौतमसोबत ती लंडनमध्ये सप्तपदी चालली आहे. कनिकाचा विवाह तिचा मित्रपरिवार आणि नातेवाईकांच्या उपस्थितीत एका पंचतारांकित हॉटेलमध्ये पार पडला आहे. कनिकाच्या विवाहसोहळय़ाची छायाचित्रे सोशल मीडियावर व्हायरल होत आहेत.

गायक मनमीत सिंहने देखील सोशल मीडियावर नवदांपत्यासोबतचे छायाचित्र शेअर केले आहे. छायाचित्रात कनिका आणि गौतमसोबत मनमीत उभा असल्याचे दिसून येते. तुमचा आगामी जीवनमय प्रवास तुमच्यासारखाच सुंदर असावा असे त्याने कॅप्शनमध्ये म्हटले आहे.

यापूर्वी कनिकाने सोशल मीडियावर विवाहापूर्वीची काही छायाचित्रे शेअर केली होती. कनिका ही युवराज, अयाना आणि समारा या अपत्यांची सिंगल मदर आहे. गायिका असलेली कनिका ही मूळची लखनौची असून तिचा पहिला विवाह वयाच्या 18 व्या वर्षी झाला होता. 2012 मध्ये कनिकाने पहिल्या पतीला घटस्फोट दिला होता. तेव्हापासून तिन्ही मुलांचे पालनपोषण तिचे करत आहे.