जॉन टर्नस होणार ‘अॅपल“चे नवे सीईओ

कंपनीचे सीईओ म्हणून 15 वर्षांनंतर बदल : कुक आता कार्यकारी अध्यक्ष राहणार

वृत्तसंस्था, कॅलिफोर्निया

जॉन टर्नस हे टीम कुक यांच्या जागी अॅपलचे नवीन सीईओ म्हणून पदभार स्वीकारणार आहेत. ते 1 सप्टेंबर, 2026 पासून कंपनीची सूत्रे हाती घेणार आहेत. कुक आता कंपनीच्या संचालक मंडळाचे कार्यकारी अध्यक्ष म्हणून आपली भूमिका स्वीकारण्यासाठी संचालक मंडळाने या योजनेला एकमताने मंजुरी दिली आहे.

टीम कुक 1998 मध्ये अॅपलमध्ये सामील झाले आणि 2011 मध्ये सीईओ बनले. त्यांच्या नेतृत्वाखाली, अॅपलचे बाजारमूल्य अंदाजे 32 लाख कोटीवरून अंदाजे 350 लाख कोटीपर्यंत वाढले आहे. कंपनीचा वार्षिक महसूल देखील 2025 मध्ये सुमारे 10 लाख कोटी रुपये वरून 39 लाख कोटी रुपयेपर्यंत वाढला आहे.

जॉन टर्नस यांचा प्रवास

जॉन टर्नस यांना स्टीव्ह जॉब्ससोबत काम करण्याचा 25 वर्षांचा अनुभव आहे. ते 2001 मध्ये या टेक कंपनीत सामील झाले. ते प्रॉडक्ट डिझाइन टीमचा देखील भाग होते. त्यांनी कंपनीचे संस्थापक स्टीव्ह जॉब्स यांच्यासोबतही काम केले आहे. अॅपलच्या आधी, त्यांनी ‘व्हर्च्युअल रिसर्च सिस्टम्स“मध्ये मेकॅनिकल इंजिनिअर म्हणून काम केले. टर्नस 2013 मध्ये हार्डवेअर इंजिनिअरिंगचे उपाध्यक्ष झाले आणि 2021 मध्ये त्यांना वरिष्ठ उपाध्यक्षपदी पदोन्नती मिळाली. गेल्या काही वर्षांत, टर्नस यांनी आयपॅड, एअरपॉड्स, आयफोन, अॅपल वॉच आणि नुकत्याच लाँच झालेल्या मॅकबुक निओ यांसारख्या प्रमुख उत्पादनांवर काम केले आहे.

टर्नस 51 वर्षाचे असून याच वयात टीम कुक यांनी अॅपलच्या सीईओ पदाचा कार्यभार स्वीकारला होता. टर्नस यांनी पेनसिल्व्हेनिया विद्यापीठातून मेकॅनिकल इंजिनिअरिंगची पदवी घेतली आहे.

टर्नस म्हणाले, ‘अॅपलचे ध्येय पुढे नेण्याची ही संधी मिळाल्याबद्दल मी खूप आभारी आहे. मी माझी जवळजवळ संपूर्ण कारकीर्द अॅपलमध्येच घालवली आहे आणि स्टीव्ह जॉब्स यांच्या मार्गदर्शनाखाली काम करण्याची संधी मिळाल्याबद्दल आणि टीम कुक यांना माझे मार्गदर्शक म्हणून लाभल्याबद्दल मी स्वत:ला भाग्यवान समजतो.“

इंजिनिअरचा मेंदू, संशोधकाचा आत्मा : टीम कुक

टीम कुक म्हणाले, ‘जॉन टर्नस यांच्याकडे इंजिनिअरचा मेंदू, संशोधकाचा आत्मा आणि सचोटीने नेतृत्व करण्याचे मन आहे. ते एक दूरदर्शी नेते आहेत, ज्यांचे गेल्या 25 वर्षांतील अॅपलसाठीचे योगदान अमूल्य आहे.“