आयपीओसाठी जिओकडून 17 बँकांची नियुक्ती

अहवालामधून माहिती : 40 हजार कोटींहून अधिकचा निधी उभारण्याचे ध्येय

वृत्तसंस्था/ मुंबई

रिलायन्स इंडस्ट्रीजच्या जिओ प्लॅटफॉर्म्सने आपल्या आयपीओसाठी 17 जागतिक आणि देशांतर्गत गुंतवणूक बँकांची नियुक्ती केली आहे. हा भारतातील आतापर्यंतचा सर्वात मोठा आयपीओ ठरू शकतो. एका अहवालात सूत्रांच्या हवाल्याने ही माहिती देण्यात आली आहे.

 गोल्डमन सॅक्स घेणार सुत्रे

जिओने इश्यूचे व्यवस्थापन करण्यासाठी गोल्डमन सॅक्स, मॉर्गन स्टॅनले आणि जेपी मॉर्गन यांसारख्या गुंतवणूक बँकिंग कंपन्यांना सामील करून घेतले असल्याचेही समोर आले आहे. याशिवाय, कोटक महिंद्रा कॅपिटल, अॅक्सिस कॅपिटल, जेएम फायनान्शियल यांसारख्या देशांतर्गत बँका देखील या टीमचा भाग आहेत.

16 लाख कोटी रुपयांचे मूल्यांकन?

जिओ प्लॅटफॉर्म्सचे मूल्यांकन सुमारे 180 अब्ज डॉलर्स (सुमारे 16 लाख कोटी रुपये) असू शकते. सेबीच्या नवीन नियमांनुसार, 5 लाख कोटी रुपयांपेक्षा जास्त मूल्यांकन असलेल्या कंपन्या केवळ 2.5 टक्के पब्लिक फ्लोटसह सूचीबद्ध होऊ शकतात. या आधारावर, जर रिलायन्सने फक्त 2.5 टक्के हिस्सा विकला, तर ते 40,000 कोटी रुपयांपेक्षा जास्त रक्कम उभारू शकते, ज्यामुळे हा भारताच्या इतिहासातील सर्वात मोठा आयपीओ ठरेल.

सेबीचे नवीन नियम फायदेशीर

जेफरीज आणि सीएलएसए सारख्या विश्लेषकांचा विश्वास आहे की सेबीच्या सुधारित नियमांमुळे जिओला लक्षणीय मदत होईल. पूर्वी कंपन्यांना किमान 10 टक्के हिस्सा विकावा लागत होता, परंतु आता मोठ्या आयपीओंसाठी 2.5 टक्क्यांची सूट देण्यात आली आहे.  यामुळे कंपनीवर प्रवर्तकांचे नियंत्रण कायम राहील आणि लिस्टिंगनंतर बाजारातील शेअर्सचा पुरवठा कमी होऊन शेअरच्या किमतींना आधार मिळू शकेल. ब्लूमबर्गच्या अहवालानुसार, रिलायन्स इंडस्ट्रीज महिन्याअखेरपर्यंत सेबीकडे, डीआरएचपी दाखल करण्याचे लक्ष्य ठेवत आहे. यामध्ये डिसेंबर 2025 अखेरपर्यंतच्या आर्थिक माहितीचा वापर केला जाऊ शकतो. लिस्टिंग करारावर स्वाक्षरी करण्याची वेळ बाजारातील स्थितीवर अवलंबून असेल.