आयटीसी खरेदी करणार अदानी समूहाचा व्यवसाय

एका अहवालामधून माहिती  : अदानी विल्मरमधील हिस्सेदारी घेण्याचे संकेत

नवी दिल्ली : 

अदानी समूह आपल्या खाद्यतेल उत्पादक कंपनी अदानी विल्मरमधील काही हिस्सा विकणार आहे. अदानी समूहाच्या अदानी विल्मरची हिस्सेदारी विकत घेण्यासाठी आयटीसी पुढे आल्याचे बोलले जात आहे. या कंपनीत अदानी समूहाचा 44 टक्के हिस्सा आहे. मात्र, अद्यापपर्यंत अदानी समूह किंवा आयटीसीकडून कोणतेही स्पष्टीकरण देण्यात आलेले नाही.

अदानी समूह 43.97 टक्के हिस्सा विकण्याचा विचार करत असल्याचे या अहवालातून समोर आले आहे. कारण कंपनी पायाभूत सुविधांपासून ऊर्जा क्षेत्रापर्यंत आपला व्यवसाय विस्तारण्यावर भर देत आहे. अदानी समूहाचीही आपली हिस्सेदारी विकण्यासाठी चर्चा सुरू आहे. मात्र याबाबत अधिकृत माहिती समोर आलेली नाही.

अदानी विल्मर हा अदानी समूह आणि सिंगापूरच्या विल्मर इंटरनॅशनलचा संयुक्त उपक्रम आहे. ज्यामध्ये दोन्ही कंपन्यांचा 43.97 टक्के वाटा आहे. आयटीसीच्या प्रवक्त्याकडून असे सांगितले जात आहे की सध्या कंपनीकडून कोणीही या अनुमानांवर भाष्य करणार नाही. आयटीसी सिगारेटपासून एफएमसीजी सारख्या क्षेत्रात व्यवसाय करते.

आयटीसीच्या एफएमसीजी महसुलातील 83 ते 84 टक्के महसूल आशीर्वाद आटा, सनफिस्ट बिस्किट, युप्पी नूडल्स यांच्यामधून मिळते. या उत्पादनांद्वारे, आयटीसीने त्याच आर्थिक वर्षात 19,123 कोटी रुपयांचा नफा कमावला होता. कंपनीला आपला पोर्टफोलिओ आणखी वाढवायचा आहे. आयटीसीला दीर्घकाळ खाद्यतेलाच्या व्यवसायात उतरायचे होते.

ही नावेही आली पुढे

अदानी समूहाची ही कंपनी विकत घेण्यासाठी कतार गुंतवणूक प्राधिकरण आणि जीक्यूजी भागीदार यांचीही नावे पुढे येत आहेत. अदानी समूह अडीच ते तीन अब्ज डॉलर्सला आपला हिस्सा विकण्याचा विचार करत असल्याची माहितीही समोर आली आहे.