इराणच्या आस्थापनांवर इस्रायलचा हल्ला

हवाई संरक्षण केंद्र, क्षेपणास्त्र तळ, अणुऊर्जा प्रकल्प लक्ष्य; संगीत शाळाही उद्ध्वस्त

वृत्तसंस्था/ तेहरान/वॉशिंग्टन

इस्रायलने शनिवारी इराणच्या दक्षिणेकडील खुझेस्तान प्रांतातील महशहर पेट्रोकेमिकल विशेष आर्थिक क्षेत्रावर हल्ला केला. स्थानिक माध्यमांनुसार, या परिसरात अनेक स्फोट झाल्यानंतर घटनास्थळावरून धूर निघत होता. नैर्त्रुत्य इराणमधील बुशेहर अणुऊर्जा प्रकल्पाजवळ एक क्षेपणास्त्र पडल्याचे वृत्त असून त्यात एका व्यक्तीचा मृत्यू झाला आहे.

इस्रायली सुरक्षा सूत्रांनीही या हल्ल्यांना इस्रायलच्या हवाई दलाने लक्ष्य केल्याची पुष्टी केली आहे. या हल्ल्यात तीन कंपन्यांना लक्ष्य करण्यात आले. वृत्तानुसार, या हल्ल्यांमध्ये पाच जण जखमी झाले आहेत. इस्रायली लष्कराने शुक्रवारी इराणच्या हवाई संरक्षण तळांवर हल्ला केल्याचा दावा केला आहे. याव्यतिरिक्त इस्रायलने शस्त्रास्त्र संशोधन आणि विकासात गुंतलेल्या एका लष्करी तळावरही हल्ला केला. या हवाई हल्ल्यात तेहरानमधील एक संगीत शाळाही पूर्णपणे उद्ध्वस्त झाली.

तेहरानमधील संगीत शाळेची हानी

इराणची राजधानी तेहरानमधील एक संगीत शाळा हवाई हल्ल्यात पूर्णपणे उद्ध्वस्त झाली. वृत्तानुसार, ही शाळा इराणी संगीताचे एक महत्त्वाचे केंद्र होते. या संगीत शाळेमध्ये अंदाजे 250 विद्यार्थी शिकत होते. ज्या इमारतीत ही शाळा होती, तिथे एक प्रसूती क्लिनिक आणि इतर सुविधाही होत्या. ही शाळा तेहरानच्या पूर्वेकडील एका लष्करी हवाई तळाजवळ होती. हल्ल्यानंतर संपूर्ण परिसर धुराने भरला होता आणि इमारतीचे मोठे नुकसान झाले होते.

इराणमध्ये दोघांना फाशी

इराणने बंदी घातलेल्या विरोधी संघटना, पीपल्स मुजाहिदीन ऑर्गनायझेशन ऑफ इराणशी संबंधित दोन व्यक्तींना फाशी दिली आहे. इराणी न्यायव्यवस्थेनुसार, अबोलहसन मोंताझर आणि वाहिद बनियामारियन यांना शनिवारी सकाळी फाशी देण्यात आली. दोघांवर दहशतवादी कारवाया आणि सशस्त्र बंडखोरीत सामील असल्याचा आरोप होता. वृत्तानुसार, सुरुवातीला एका सत्र न्यायालयाने दोघांना दोषी ठरवले होते, त्यानंतर सर्वोच्च न्यायालयाने ही शिक्षा कायम ठेवली होती.

इराणमधील इंटरनेट बंदी 36 दिवसांपासून सुरूच

इराणमधील इंटरनेट बंदी आता अत्यंत लांबली आहे. इंटरनेटवर लक्ष ठेवणारी संस्था नेटब्लॉक्सच्या मते, देशातील इंटरनेट जवळपास 36 दिवसांपासून (अंदाजे 840 तास) बंद आहे. या काळात आंतरराष्ट्रीय इंटरनेटचा सार्वजनिक वापर जवळजवळ पूर्णपणे बंद झाल्यामुळे लोकांचा बाह्य जगाशी संपर्क तुटला आहे.

विद्यापीठांचे वर्ग ऑनलाइन होणार

इराणमधील सर्व विद्यापीठांचे वर्ग आता ऑनलाइन सुरू करण्यात येणार आहेत. हा निर्णय देशाच्या विज्ञान, संशोधन आणि तंत्रज्ञान मंत्रालयाने घेतला आहे. सध्या इंटरनेट यंत्रणा बंद असली तरी त्यावर तात्पुरता तोडगा काढला जाऊ शकतो. सरकारकडून पुढील सूचना मिळेपर्यंत हे सुरू राहील. ज्या विद्यार्थ्यांना ऑनलाइन शिक्षण घेण्यात अडचण येऊ शकते, त्यांच्यासाठी पर्यायी मार्ग शोधण्याचे निर्देशही सरकारने विद्यापीठांना दिले आहेत.