इराणने फेटाळला युद्धविराम प्रस्ताव

हल्ले सुरू असताना थेट चर्चा होणार नसल्याचे स्पष्टीकरण

वृत्तसंस्था/ तेहरान

पश्चिम आशियातील सुरू असलेला संघर्ष कमी होण्याची कोणतीही चिन्हे दिसत नाहीत. एकीकडे अमेरिकेकडून लष्करी कारवाईचा इशारा दिला जात असतानाच दुसरीकडे इराण आखाती प्रदेशातील अमेरिकेच्या मालमत्तेला लक्ष्य करत आहे. दरम्यान, मध्यस्थांनी सादर केलेल्या प्रस्तावांवर मतप्रदर्शन करताना युद्धविरामास नकार दर्शवला आहे. जोपर्यंत अमेरिका आणि इस्रायल हल्ले तीव्र करत राहतील, तोपर्यंत इराण थेट चर्चेत सहभागी होणार नाही, असे इराणच्या परराष्ट्र मंत्रालयाने सोमवारी जाहीर केले.

इराणच्या परराष्ट्र मंत्रालयाच्या प्रवक्त्याने सोमवारी युद्धाबाबतची रणनीती स्पष्ट केली. अमेरिकेच्या 15-कलमी प्रस्तावात अवाजवी मागण्या असल्याचा दावा करतानाच इराणने आपल्या मागण्यांचा एक वेगळा संच तयार करून त्याला औपचारिक स्वरूप दिले आहे. इस्फहानमधील वैमानिक बचाव मोहीम ही इराणचे समृद्ध युरेनियम जप्त करण्याच्या उद्देशाने रचलेली केवळ एक खेळी असण्याची शक्यता नाकारता येत नाही. यामुळे विरोधी पक्षाला पुन्हा संघटित होऊन आपल्या कारवाया सुरू ठेवण्याची संधी मिळू शकते, असे इराणच्या परराष्ट्र मंत्रालयाने म्हटले आहे. ओमानसोबतच्या चर्चेचा मुख्य भर होर्मुझच्या सामुद्रधुनीतून जहाजांच्या सुरक्षित वाहतुकीसाठी एक प्रोटोकॉल स्थापित करण्यावर असल्याचेही प्रवक्त्याने म्हटले आहे.