चोरीचा तपास करण्याची सूचना करा

बेळगाव : संगमेश्वरनगर येथे 25 मे 2025 रोजी घडलेल्या चोरी प्रकरणाचा तपास एपीएमसी पोलिसांकडून रेंगाळला आहे. या चोरीमध्ये सुमारे 7 लाख रुपयांचे दागिने पळविले आहेत. त्यामुळे या प्रकरणाचा तपास करण्याची सूचना पोलिसांना करावी, अशा मागणीचे निवेदन गुरुवारी संगमेश्वरनगर येथील मीना चौहान व त्यांचा मुलगा संजयकुमार यांनी अप्पर जिल्हाधिकारी विजयकुमार होनकेरी यांना दिले आहे. संगमेश्वरनगर येथे झालेल्या चोरीत सुमारे 6 लाख 30 हजार रुपयांचे सोन्याचे दागिने व 70 हजार रुपयांचे चांदीचे दागिने अशा एकूण 7 लाख रुपयांच्या ऐवजावर चोरट्यांनी डल्ला मारला आहे. या प्रकरणी एपीएमसी पोलिसात गुन्हा दाखल झाला असून, अद्याप या प्रकरणाचा तपास लागला नाही. त्यामुळे पोलिसांना तपासाची सूचना करावी, अशी मागणी केली आहे.