महागाईचा दबाव, एफएमसीजी विक्री मजबूत राहण्याचे संकेत

क्रिसिलच्या अहवालामधून माहिती: जवळपास 8 ते 10 टक्क्यांच्या वाढीची अपेक्षा

वृत्तसंस्था/ नवी दिल्ली

देशातील जलद गतीने विकल्या जाणाऱ्या ग्राहक वस्तू म्हणजेच एफएमसीजी क्षेत्रात आर्थिक वर्ष 2027 मध्येही जोरदार वाढ नोंदवली जाऊ शकते. रेटिंग एजन्सी क्रिसिलच्या एका नवीन अहवालानुसार, वाढती महागाई आणि खर्चाचा दबाव असूनही, एफएमसीजी क्षेत्राची कमाई 8 ते 10 टक्क्यांनी वाढण्याची शक्यता व्यक्त केली आहे.

या अहवालात 74 एफएमसीजी कंपन्यांचा अभ्यास करण्यात आला आहे, ज्यांचा या क्षेत्राच्या 6.6 लाख कोटी रुपयांच्या अंदाजित महसुलात जवळपास एक तृतीयांश वाटा आहे. यावर्षी एफएमसीजी कंपन्यांच्या वाढीचे मुख्य कारण उत्पादनांच्या किमतीत झालेली वाढ असेल. पश्चिम आशियाई तणावामुळे कच्च्या तेलाची आणि संबंधित पॅकेजिंग साहित्याची किंमत वाढली आहे, असेही क्रिसिलने म्हटले आहे.

कंपन्या या वाढलेल्या खर्चाचा काही भाग ग्राहकांवर लादू शकतात, ज्यामुळे उत्पादनांच्या किमती वाढतील. यामुळे, कंपन्यांच्या नफ्यात 6 ते 7 टक्क्यांची वाढ होण्याचा अंदाज आहे. तथापि, मागील आर्थिक वर्षातील 5 ते 6 टक्क्यांवरून विक्रीच्या प्रमाणात होणारी वाढ 2 ते 3 टक्क्यांपर्यंत मंदावू शकते.

बाजारांवर महागाईचा परिणाम

क्रिसिलच्या मते, वाढत्या महागाईचा परिणाम शहर आणि गाव या दोन्ही ठिकाणच्या लोकांच्या खर्च करण्याच्या क्षमतेवर होईल. इंधनाच्या किमती आणि दैनंदिन गरजेच्या वस्तूंच्या वाढत्या खर्चामुळे घरगुती बजेटवर दबाव वाढू शकतो. याशिवाय, यावर्षी सामान्यपेक्षा कमी मान्सूनच्या शक्यतेमुळे ग्रामीण बाजारातील मागणीवरही परिणाम होऊ शकतो.