भारताचा विकास दर 6.5 टक्के इतका राहणार
रेटिंग एजन्सी एस अँड पी ग्लोबलचा अंदाज
वृत्तसंस्था/ नवी दिल्ली
जागतिक रेटिंग एजन्सी एस अँड पी ग्लोबल रेटिंग्स यांनी भारताची अर्थव्यवस्था आर्थिक वर्ष 2026 मध्ये 6.5टक्के इतकी विकसित राहणार असल्याचा अंदाज व्यक्त केला आहे. पुढील वर्षी भारतीय अर्थव्यवस्था 6.7 टक्के इतकी विकसित राहील असेही एजन्सीने म्हटले आहे.
करात करण्यात आलेली कपात, मजबूत मागणी लक्षात घेता एजन्सीने वरील प्रमाणे भारताच्या विकासदाराचा अंदाज वर्तवला आहे. आर्थिक वर्ष 2025-26 च्या पहिल्या तिमाहीमध्ये म्हणजेच एप्रिल ते जून कालावधीत भारताचा जीडीपी दर 7.8 टक्के इतका राहिला आहे. जो मागच्या पाच तिमाहीत पाहता सर्वाधिक वाढीचा राहिला. एस अँड पी ग्लोबल रेटिंग्स यांनी ‘इकॉनॉमिक आउटलॉक एशिया पॅसिफिक’च्या अहवालामध्ये वरील अंदाज वर्तवला आहे. अहवालानुसार भारताचा जीडीपी दर आर्थिक वर्ष 2026 मध्ये 6.5 टक्के तर 2027 च्या आर्थिक वर्षामध्ये 6.7 टक्के इतका राहणार आहे.
रिझर्व्ह बँकेचा अंदाज
रिझर्व्ह बँकेने याआधीच भारताचा जीडीपी दर 6.8 टक्के राहणार असल्याचा अंदाज वर्तवला होता. जीएसटी दरात केलेली कपात, प्राप्ती करात सवलत त्याचप्रमाणे व्याजदरात केलेली कपात या साऱ्याचा अभ्यास आरबीआयने केलाय.