भारताचा जीडीपी 6.6 टक्के राहणार

आर्थिक वर्ष 26 साठीचा आयएमएफचा अंदाज

नवी दिल्ली :

आंतरराष्ट्रीय नाणे निधीने (आयएमएफने) भारतासाठी महागाईचा अंदाजही कमी केला. आर्थिक वर्ष-26 मध्ये महागाई 2.8 टक्के राहण्याची अपेक्षा आहे. भारताची अर्थव्यवस्था आर्थिक वर्ष-26 मध्ये 6.6 टक्के दराने वाढणार असल्याचा अंदाज आंतरराष्ट्रीय नाणेनिधीने (आयएमएफ) व्यक्त केला आहे.

भारताचा सकल देशांतर्गत उत्पादन (जीडीपी) वाढीचा अंदाज वाढवला आहे. जुलैच्या सुरुवातीला, आयएमएफने आर्थिक वर्ष-26 मध्ये भारताचा जीडीपी वाढीचा दर 6.4 टक्के राहण्याचा अंदाज वर्तवला होता. आयएमएफने ऑक्टोबरच्या जागतिक आर्थिक दृष्टिकोन अहवालात म्हटले आहे की 2025-26 या आर्थिक वर्षात भारताची अर्थव्यवस्था पूर्वीच्या अंदाजांपेक्षा वेगाने वाढेल. त्याच वेळी, आयएमएफने आर्थिक वर्ष 27 साठीचा अंदाज किंचित कमी करून 6.2 टक्के केला आहे.

जागतिक बँकेने भारताच्या जीडीपी वाढीचा अंदाजदेखील वाढवला आहे. आयएमएफच्या मते, आर्थिक वर्ष 26 च्या पहिल्या तिमाहीत भारताच्या अर्थव्यवस्थेने 7.8टक्क्यांची प्रभावी वाढ नोंदवली आहे, जी एका वर्षातील सर्वात जलद वाढ आहे. दुसऱ्या तिमाहीत देखील सुमारे 7 टक्क्यांची वाढ अपेक्षित आहे. ही मजबूत कामगिरी देशांतर्गत मागणीत वाढ, सेवा क्षेत्रातील निर्यातीत वाढ आणि वर्षाच्या सुरुवातीला चांगली कामगिरी यामुळे आहे.

आयएमएफने म्हटले आहे की, हे सकारात्मक ट्रेंड अमेरिकेच्या टॅरिफचा भारतावरील परिणाम झाकून टाकत आहेत. आयएमएफच्या आधी, जागतिक बँक आणि रिझर्व्ह बँक ऑफ इंडिया (आरबीआय) ने देखील भारताच्या जीडीपी वाढीचा अंदाज वाढवला होता. जागतिक बँकेने गेल्या आठवड्यात मजबूत वापर आणि जीएसटी सुधारणांचा हवाला देत आर्थिक वर्ष 26 साठीचा अंदाज 6.3 वरून 6.5  टक्केपर्यंत वाढवला होता. त्याच वेळी, आरबीआयनेदेखील आपला अंदाज 6.5 वरून 6.8 टक्क्यांपर्यंत वाढवला होता.

भारत जगातील सर्वात वेगवान अर्थव्यवस्था आयएमएफने म्हटले आहे की, भारत, मलेशिया, फिलीपिन्स आणि थायलंडसारख्या देशांमध्ये महागाई अपेक्षेपेक्षा कमी राहिली आहे. जागतिक व्यापारातील अनिश्चितता आणि कडक धोरण असूनही, भारत जगातील सर्वात वेगाने वाढणारी प्रमुख अर्थव्यवस्था म्हणून उदयास आली आहे.

तज्ञांचा असा विश्वास आहे की, भारताच्या अर्थव्यवस्थेला मजबूत देशांतर्गत मागणी, वाढती निर्यात आणि जीएसटी सुधारणांचा पाठिंबा मिळत आहे. तथापि, व्यापारातील अडथळे आणि व्याजदरांमधील बदल यासारख्या जागतिक आव्हानांवर लक्ष ठेवणे आवश्यक आहे. तरीही भारताचे आर्थिक भविष्य उज्ज्वल दिसते आणि हा देशासाठी एक सकारात्मक संदेश आहे.