भारतीय महिलांचा जपानवर विजय

वृत्तसंस्था, काकामिगाहारा : येथे सुरू असलेल्या आशियाई क्रीडा स्पर्धेत, भारतीय महिला हॉकी संघाने यजमान जपानचा 3-1 असा पराभव करून आपली विजयी घौडदौड कायम राखली. हा त्यांचा सलग चौथा विजय असून, यासह त्यांनी उपांत्य फेरीतील स्थान जवळपास निश्चित केले आहे. भारतासाठी लालरेमसिआमी (5 व्या मिनिटाला), इशिका चौधरी (30 व्या मिनिटाला) आणि नवनीत कौर (36 व्या मिनिटाला) यांनी गोल केले. जपानचा एकमेव गोल 46 व्या मिनिटाला शिहो कोबायाकावा हिने केला. भारत रविवारी सिंगापूरविरुद्धच्या सामन्याने ‘पूल बी‘ मधील आपल्या मोहिमेची सांगता करेल.

प्रभावी कामगिरी कायम

या स्पर्धेत सलग तीन विजय मिळवल्यानंतर भारत या सामन्यासाठी मैदानात उतरला होता. भारतीय महिलांनी उझबेकिस्तानवर 19-0 असा विजय मिळवून मोहिमेची सुरुवात केली होती; त्यानंतर इंडोनेशियावर 17-1 असा विजय मिळवला आणि नंतर थायलंडचा 20-1 असा पराभव करून ‘पूल बी‘ मध्ये अव्वल स्थान पटकावले. भारतीय खेळाडूंनी आपली उत्कृष्ट कामगिरी सुरूच ठेवली आणि लालरेमसिआमीने केलेल्या ‘फील्ड गोल‘द्वारे पाचव्या मिनिटालाच आघाडी घेतली.

भारतीय खेळाडूंनी सामन्यावर आपले वर्चस्व राखले आणि जपानच्या बचावफळीवर अनेक आक्रमणे केली, मात्र जपानची बचावफळी ठामपणे उभी राहिली. जपानलाही काही संधी मिळाल्या, पण त्यांना भारतीय बचावफळी भेदण्यात अपयश आले. तथापि, पेनल्टी कॉर्नर्सच्या बाबतीत भारत काहीसा निष्काळजी ठरला; पहिल्या सत्रात मिळालेल्या पाच संधींपैकी केवळ एका संधीचे रूपांतर गोलमध्ये करता आले आणि तो गोलही ‘रिबाउंड‘द्वारे झाला.

पहिल्या सत्रातील घडामोडी

पहिल्या सत्राच्या शेवटच्या दोन मिनिटांत भारताला कमी वेळात तीन पेनल्टी कॉर्नर्स मिळाले. त्यापैकी शेवटच्या संधीवर इशिकाने गोल केला; नवनीत कौरचा सुरुवातीचा फटका जपानी गोलकीपरने अडवला होता, पण त्यानंतर मिळालेल्या ‘रिबाउंड‘वर इशिकाने गोल नोंदवला. बाजू बदलल्यानंतरही भारतीय खेळाडूंनी त्याच लयीत खेळ सुरू ठेवला आणि तिस्रया सत्राच्या सहाव्या मिनिटाला आघाडी वाढवली. नवनीतने उत्कृष्ट ‘स्टिकवर्क‘ करत चेंडूवर नियंत्रण मिळवले आणि ‘स्कूप‘द्वारे गोल केला. भारताने चेंडूवर ताबा मिळवण्याच्या बाबतीत उत्कृष्ट कामगिरी केली आणि तिस्रया सत्रात खेळावर वर्चस्व गाजवले. जपानी खेळाडूंना भारताच्या मैदानातील भागात  प्रवेश करणे कठीण जात होते आणि जेव्हा त्यांनी तसे केलेही, तेव्हा त्यांना भारताच्या सुव्यवस्थित बचावफळीला भेदण्यात अपयश आले. दुस्रया सत्रातील आव्हाने

तिस्रया सत्राच्या अगदी शेवटच्या क्षणांत नवनीतने जोरदार फटका मारून भारताची आघाडी वाढवण्याचा प्रयत्न केला, परंतु जपानी गोलकीपरने तो फटका अडवून चेंडू दूर केला. मात्र, चौथ्या आणि अंतिम सत्रात जपानी संघाने आक्रमक पवित्रा घेत भारतीय बचावफळीची चांगलीच कोंडी केली. या सत्राच्या सुरुवातीलाच, पहिल्या मिनिटाला कोबायाकावाने ‘सर्कल‘च्या बाहेरून ‘टोमाहॉक‘ फटक्याद्वारे शानदार गोल केला; भारताची अनुभवी गोलकीपर सविताला हा फटका रोखता आला नाही. 50 व्या मिनिटाला भारताला आणखी एक पेनल्टी कॉर्नर मिळाला, पण भारतीय खेळाडूंनी ती संधी वाया घालवली. सामना संपण्याला चार मिनिटे बाकी असताना जपानलाही पेनल्टी कॉर्नर मिळाला, मात्र भारतीय खेळाडूंनी भक्कम बचाव करत तो धोका परतवून लावला.