भारतीय स्किट नेमबाजांची पात्रतेसाठी संघर्ष

वृत्तसंस्था, लोनेटो (इटली)

येथे सुरू असलेल्या आयएसएसएफ विश्वचषक शॉट गन नेमबाजी स्पर्धेत दुसऱ्या दिवसाअखेर पात्रतेच्या चार फेऱ्या संपल्या असून महिलांच्या विभागात भारताची युवा स्किट नेमबाज पेरीनाझ ढालीवालची कामगिरी समाधानकारक झाली असून ती संयुक्त 23 व्या स्थानावर आहे. अंतिम फेरीसाठी पात्र ठरण्याकरिता तिला पात्रता विभागातील आणखी एक फेरी खेळावी लागणार आहे.

या स्पर्धेच्या दुसऱ्या दिवशी ढालीवालने 22 आणि 24 शॉट्सची नोंद केली. स्पर्धेच्या पहिल्या दिवशी तिने 24 आणि 23 शॉट्स नोंदविले होते. ढालीवालने 100 पैकी सरासरी 93 शॉट्स नोंदवित संयुक्त 23 वे स्थान मिळविले आहे. या स्पर्धेत सहभागी झालेल्या भारताच्या रैझा धिलाँ आणि माहेश्वरी चौहान यांची कामगिरी निराशाजनक झाली.

पुरूषांच्या स्किट नेमबाजी प्रकारातील चौथ्या फेरीत भारताच्या मैराज अहमद खानने 75 पैकी 74 शॉट्स नोंदवित संयुक्त सातवे स्थान मिळविले आहे.  पुरूषांच्या विभागात भारताच्या गिल आणि नारुका यांचे आव्हान मात्र समाप्त झाले आहे.