भारतीय अर्थव्यवस्था 4 ट्रिलियन डॉलर्सपर्यंत पोहोचणार

भारताचे मुख्य आर्थिक सल्लागार व्ही.अनंत नागेश्वरन यांचा अंदाज

नवी दिल्ली :

मार्च 2025 च्या अखेरीस जीडीपीने  3.9 ट्रिलियन डॉलर्सचा टप्पा ओलांडला आहे. भारत या आर्थिक वर्षात 4 लाख कोटी (ट्रिलियन) डॉलर्सपेक्षा अधिकची अर्थव्यवस्था बनण्याच्या मार्गावर आहे, असे भारताचे मुख्य आर्थिक सल्लागार व्ही. अनंत नागेश्वरन म्हणाले आहेत.

आयव्हीसीए ग्रीन रिटर्न समिट 2025 मध्ये बोलताना नागेश्वरन म्हणाले की, ‘या आर्थिक वर्षात अर्थव्यवस्था मोठ्या प्रमाणात 4 ट्रिलियन डॉलर्सचा टप्पा ओलांडत आहे. मार्च 2025 च्या अखेरीस आपण 3.9 ट्रिलियन डॉलर्सवर होतो आणि भूराजकीय परिस्थिती खूपच अशांत आहे. त्यात बरीच अनियमितता आहे.’ आर्थिक वाढ ही केवळ समृद्धीसाठी आवश्यक नाही तर जागतिक परिस्थितीत आपले स्थान आणि प्रभाव टिकवून ठेवण्यासाठी देखील एक अतिशय महत्त्वाची अट आहे. ते म्हणाले, ‘जर आपल्याला पुढील 10-15 वर्षांत दरवर्षी 80 लाख नोकऱ्या निर्माण करायच्या असतील तर आर्थिक वाढ आवश्यक आहे.

‘अर्थव्यवस्था हरित करणे, ऊर्जा संक्रमण, पर्यावरण आणि हवामान बदलाच्या बाबतीत आपण जे काही करतो ते जवळच्या आणि मध्यम कालावधीत आपल्या प्राधान्यांशी सुसंगत असले पाहिजे,’ असे ते म्हणाले. देशाची उर्जेची मागणी निश्चितच वाढणार आहे. म्हणूनच, ऊर्जा परिवर्तन स्टार्टअप्सपेक्षा ऊर्जा तीव्रता कमी करणारे स्टार्टअप्स अधिक महत्त्वाचे आहेत. बहुतेक देशांनी ऊर्जा वापराची उच्च पातळी गाठल्यानंतर 2050 पर्यंत निव्वळ शून्य उत्सर्जन करण्याचे वचन दिले आहे. भारत हा कमी मध्यम उत्पन्न असलेला देश आहे आणि त्याला उर्जेची सर्वोच्च पातळी गाठायची आहे.

एमएसएमईसाठी भांडवलाची उपलब्धता

एमएसएमईंना वेळेवर वित्त आणि भांडवल पुरवणे हे विकास, आधुनिकीकरण आणि औपचारिक वित्त व पुरवठा साखळीशी समन्वय साधण्यासाठी अत्यंत महत्त्वाचे आहे, असेही त्यांनी नमूद केले.