भारताने भूतानचा धुव्वा उडविला

सॅफ 19 वर्षांखालील चॅम्पियनशिप स्पर्धेच्या अंतिम फेरीत धडक

वृत्तसंस्था / पोखरा (नेपाळ)

अखिल भारतीय फुटबॉल महासंघाच्या (एआयएफएफ) माहितीनुसार भारतीय 17 वर्षांखालील महिला संघाने बुधवारी येथे रंगशाला स्टेडियमवर झालेल्या सॅफ 19 वर्षांखालील महिला चॅम्पियनशिप 226 च्या त्यांच्या शेवटच्या राऊंडरॉबिन सामन्यात भूतानचा 8-0 असा पराभव केला.

पर्ल फर्नांडिसने 16, 39, 41 मिनिटाला गोल करुन हॅट्ट्रीक तर प्रीतिका बर्मनने 25, 90 व्या मिनिटाला गोल केले. अलीशा लिंगडोहने 6 व्या, अभिस्ता बसनेतने 10 व्या आणि दिव्यानी लिंडाने 17 व्या मिनिटाला गोल केले. बुधवारी दुसऱ्या सामन्यात बांगलादेशने यजमान नेपाळचा 4-0 असा पराभव केल्यानंतर यंग टायग्रेसेसने सॅफ 19 वर्षांखालील महिला चॅम्पियनशिप 226 च्या अंतिम फेरीत आपले स्थान निश्चित केले आहे. अशा प्रकारे, भारताने तीन सामन्यांतून सहा गुणांसह गुणतालिकेत दुसरे स्थान पटकावले. जे अव्वल स्थानी असलेल्या बांगलादेशपेक्षा तीन गुणांनी कमी आहे. यजमान संघ तीन गुणांसह तिसऱ्या स्थानावर राहिला तर भूतानला एकही गुण न मिळाल्याने ते तळाशी आहेत. अव्वल दोन संघ, भारत आणि बांगलादेश, आता शनिवारी 7 फेब्रुवारी रोजी अंतिम फेरीत आमनेसामने येतील. भारतीय 17 वर्षांखालील महिला संघ एएफसी 17 वर्षांखालील महिला आशियाई कप चीन 2026 च्या तयारीचा भाग म्हणून उच्च वयोगटातील सॅफ 19 वर्षांखालील महिला चॅम्पियनशिपमध्ये सहभागी होत आहे.