भारत ‘एफडीआय’मध्ये 11 व्या स्थानी

दोन अंकांनी वधारुन जगातील मोठे एफडीआय केंद्र : युनायटेड नेशन्स कॉन्फरन्स ऑन ट्रेड अँड डेव्हलपमेंट

वृत्तसंस्था, नवी दिल्ली

युनायटेड नेशन्स कॉन्फरन्स ऑन ट्रेड अँड डेव्हलपमेंट (युएनसीटीएडी) ने मंगळवारी प्रसिद्ध केलेल्या जागतिक गुंतवणूक अहवाल 2026 नुसार, भारत दोन स्थानांनी वर चढून 2025 मध्ये थेट परकीय गुंतवणूक (एफडीआय) स्वीकारणारा जगातील 11 वा सर्वात मोठा देश बनला आहे. सेवा, उत्पादन आणि पुरवठा साखळी सुधारण्यासाठी केलेल्या सातत्यपूर्ण गुंतवणुकीमुळे भारताचे स्थान अधिक मजबूत झाले आहे. अहवालात म्हटले आहे की, ‘2025 मध्ये एक प्रमुख गुंतवणूक केंद्र म्हणून भारत आपले स्थान अधिक मजबूत करत आहे. यासाठी, भारताने एक सक्रिय धोरण स्वीकारले आणि सेवा क्षेत्रापलीकडे आपला पाया विस्तारला, तसेच प्रगत उत्पादनाला गती दिली.’

2025 मध्ये, भारतातील थेट परकीय गुंतवणुकीचा ओघ सुमारे 44 टक्क्यांनी वाढून 38.89 अब्ज डॉलर्सवर पोहोचला. 2024 मध्ये भारताला 27.09 अब्ज डॉलर्सची थेट परकीय गुंतवणूक मिळाली आणि भारताचा क्रमांक 13 वा होता. विकसनशील देशांमधील थेट परकीय गुंतवणुकीचा ओघ केवळ 2 टक्क्यांनी वाढला आहे, तर आशियातील विकसनशील देशांमधील थेट परकीय गुंतवणुकीचा ओघ 3 टक्क्यांनी वाढला आहे. या समजाच्या विपरीत, भारताचे स्थान मजबूत राहिले आहे.

भारतातील वाढलेल्या गुंतवणुकीमुळे, दक्षिण आशियातील थेट परकीय गुंतवणूक मागील वर्षीच्या 34 अब्ज डॉलर्सवरून 2025 मध्ये 46 अब्ज डॉलर्सपर्यंत वाढण्याची अपेक्षा आहे. मात्र,  युएनसीटीएडीने आपल्या अहवालात इशारा दिला आहे की, शुल्कातील अनिश्चितता, पुरवठा साखळीतील बदल आणि जागतिक गुंतवणुकीतील कमतरता नवीन उत्पादन आणि पायाभूत सुविधांच्या कामांच्या गतीवर परिणाम करत आहेत.

अहवालात म्हटले आहे की, ‘गुंतवणुकीचे स्वरूप हळूहळू अधिक प्रस्थापित नवोन्मेष केंद्रांपासून दूर जात आहे. भारताचा आवाका, वेगाने वाढणारी डिजिटल मागणी, तांत्रिक कौशल्य आणि क्लाउड सेवांसाठी विस्तारणारी बाजारपेठ यांमुळे भारत गुंतवणुकीचा एक प्रमुख प्राप्तकर्ता म्हणून उदयास आला आहे.’