भारताला 8 टक्के विकासदर गाठण्यासाठी खासगी गुंतवणूक आवश्यक

जवळपास ही गुंतवणूक 30 टक्क्यांपर्यंत वाढवा : माजी मुख्य आर्थिक सल्लागार सुब्रमण्यन यांचे मत

वृत्तसंस्था, नवी दिल्ली

माजी मुख्य आर्थिक सल्लागार के. व्ही. सुब्रमण्यन यांचा विश्वास आहे की, भारताकडे आपला सध्याचा 7 टक्के आर्थिक विकास दर 8-9 टक्केपर्यंत वाढवण्याची पूर्ण क्षमता आहे. भारताने गेल्या काही वर्षांत स्थूल आर्थिक स्थिरता प्राप्त केली आहे, परंतु आता ‘संस्थात्मक सुधारणांची’ वेळ आली आहे. ते म्हणाले की, व्यवसाय करण्याचा खर्च कमी करण्यासाठी देशाला आता न्यायपालिका, नोकरशाही आणि घटक बाजारपेठांमध्ये (जमीन, श्रम आणि भांडवल) मोठ्या सुधारणा करण्याची गरज आहे.

...तर 9 टक्के विकास दर शक्य

सुब्रमण्यन म्हणाले की, भारताच्या जलद विकासाच्या प्रवासात खासगी गुंतवणूक नेहमीच मुख्य प्रेरक शक्ती राहिली आहे. एक काळ असा होता जेव्हा भारताच्या जीडीपीमध्ये खासगी गुंतवणुकीचा वाटा 30 टक्क्यांहून अधिक होता, जो आज सुमारे 22-23 टक्क्यांपर्यंत खाली आला आहे. विकास दर 9 टक्क्यांपर्यंत नेण्यासाठी ही गुंतवणुकीतील तफावत महत्त्वाची आहे.

त्यांनी असेही स्पष्ट केले की, गेल्या 5 वर्षांत सरकारने केलेल्या मोठ्या गुंतवणुकीमुळे अशी पायाभूत सुविधा निर्माण झाली आहे, जी खासगी क्षेत्रातील गुंतवणूक आकर्षित करण्यासाठी एक मजबूत पाया पुरवते. बँकांची कमी असलेली एनपीएची (अनुत्पादक मालमत्ता) पातळी देखील या गुंतवणुकीला प्रोत्साहन देण्यासाठी अधिक चांगली आहे.

भारतासाठी एआय गेम चेंजर

तंत्रज्ञानाच्या क्रांतीच्या युगात, सुब्रमण्यन यांनी ‘आर्टिफिशियल इंटेलिजन्स’ ला भारतासाठी एक गेम चेंजर म्हणून संबोधले. स्वत:चे ‘चॅटजीपीटी’ तयार करण्याच्या शर्यतीत उतरण्याऐवजी, भारताने एआयचा सर्वात प्रभावी ‘वापरकर्ता’ बनण्यावर लक्ष केंद्रित केले पाहिजे, असे त्यांना वाटते. आरोग्यसेवा, शिक्षण, उत्पादन, लघु उद्योग (एमएसएमई) आणि सर्वात महत्त्वाचे म्हणजे सरकारी प्रशासनामध्ये एआयचा वापर केल्यास देशाची उत्पादकता अनेक पटींनी वाढू शकते. ही उत्पादकता अखेरीस भारताला जागतिक स्पर्धेत विजय मिळवून देईल.