गेल्या काही काळापासून मध्यपुर्वेत उद्भवलेल्या युद्धजन्य परिस्थितीमुळे जगाच्या अर्थव्यवस्थेवर मोठा परिणाम झाला आहे. इराणकडून होर्मुझ सामुद्रधुनीची ( strait of Hormuz) कोंडी झाल्यामुळे भारताच्या इंधन पुरवठ्यावर मोठा परिणाम झाला आहे. याच पार्श्वभूमीवर पंतप्रधान नरेंद्र मोदी यांच्याकडून देशवासियांना इंधन बचतीचे आणि काटकसरीचे आवाहन करण्यात आले होते.
Advertisement
मिळालेल्या माहितीनुसार इंधन टंचाईच्या पार्श्वभूमीवर पंतप्रधान नरेंद्र मोदी यांच्या शुक्रवारी संयुक्त अरब अमिरातीच्या अल्पकालीन दौऱ्यादरम्यान एलपीजी पुरवठा करारावर स्वाक्षरी करण्यात आली. चला पाहूया याबाबतचे सविस्तर वृत्त.
सामरिक करार
Advertisement
इस्रायलचा पाठिंबा असलेल्या अमेरिका आणि इराण यांच्यातील युद्धामुळे निर्माण झालेल्या ऊर्जा संकटाचा सामना जग करत असताना, या युद्धाचा प्रभाव कमी करण्यास मदत व्हावी म्हणून भारताने संयुक्त अरब अमिरातीसोबत द्रवीकृत पेट्रोलियम वायू (एलपीजी) पुरवठ्यासाठी एक सामरिक करार केला आहे.
भारत हा जगातील दुसरा सर्वात मोठा एलपीजी आयातदार देश आहे, त्यामुळे जागतिक तणावाच्या काळात पुरेसा पुरवठा सुनिश्चित करण्यासाठी हा करार अत्यंत महत्त्वाचा आहे. पंतप्रधान नरेंद्र मोदी यांच्या संयुक्त अरब अमिरातीच्या (UAE) दोन तासांच्या संक्षिप्त दौऱ्यादरम्यान या करारावर स्वाक्षरी करण्यात आली.
एलपीजी कराराव्यतिरिक्त, दोन्ही देशांनी सामरिक पेट्रोलियम साठ्यांसंदर्भात सामंजस्य करारावर (एमओयू) स्वाक्षरी केली. शुक्रवार, १५ मे रोजी भारतात पेट्रोल आणि डिझेलच्या दरात प्रत्येकी ३ रुपयांनी वाढ केल्यानंतर काही तासांतच हा करार झाला आहे.
अबूधाबी येथे पंतप्रधानांचा मुक्काम आणि स्वाक्षरी
भारत-नॉर्डिक शिखर परिषदेच्या मार्गावर अबू धाबी येथे झालेल्या मोदींच्या अल्प मुक्कामादरम्यान या महत्त्वाच्या करारांवर स्वाक्षरी करण्यात आली. पश्चिम आशियातील सुरू असलेल्या अशांततेच्या पार्श्वभूमीवर आपल्या या संक्षिप्त दौऱ्यात मोदींनी संयुक्त अरब अमिरातीचे अध्यक्ष शेख मोहम्मद बिन झायद अल नाहयान (एमबीझेड) यांची भेट घेतली.
वडिनार येथे जहाज दुरुस्ती क्लस्टर स्थापन करणार
भारत आणि संयुक्त अरब अमिरातीने दोन्ही देशांमधील सामरिक संरक्षण भागीदारीच्या आराखड्यावर एका करारावर आणि गुजरातच्या वडीनार येथे जहाज दुरुस्ती क्लस्टर स्थापन करण्यासंदर्भात एका सामंजस्य करारावरही स्वाक्षरी केली.
मोदींचा यूएई दौरा अशा महत्त्वाच्या वेळी होत आहे, कारण काही दिवसांपूर्वीच त्यांनी इंधनाची बचत करण्यासाठी संपूर्ण देशाला घरून काम करण्याचे आवाहन केले होते. तसेच, अधिक ऊर्जा कार्यक्षमतेसाठी कार्यालयात जाणाऱ्या लोकांना सार्वजनिक वाहतुकीचा वापर करण्यास किंवा कारपूल करण्यासही सांगितले होते.
पंतप्रधानांनी पश्चिम आशियातील युद्धाचा भारतातील ऊर्जा आणि आर्थिक परिणाम कमी करण्यासाठी केलेल्या उपाययोजनांना देशभक्तीचे कर्तव्य म्हणून मांडले.
पेट्रोल, डिझेलच्या दरात वाढ
मोदींच्या राष्ट्राला केलेल्या आवाहनानंतर काही दिवसांनी, शुक्रवारी भारतात पेट्रोल आणि डिझेलच्या दरात प्रत्येकी ३ रुपयांनी वाढ झाली.
सरकारी तेल कंपन्यांनी पेट्रोलचा दर ९४.७७ रुपये प्रति लिटरवरून ९७.७७ रुपये प्रति लिटर , तर डिझेलचा दर ८७.६७ रुपये प्रति लिटरवरून ९०.६७ रुपये प्रति लिटरपर्यंत वाढवला आहे. मात्र, वेगवेगळ्या शहरांमध्ये स्थानिक करांनुसार किंमती वेगवेगळ्या असतात.
इंधन दरवाढ पूर्वसूचनेशिवाय झालेली नाही, कारण पेट्रोलियम मंत्री हरदीप सिंग पुरी यांनी यापूर्वीच अशा दरवाढीचे संकेत दिले होते. युद्धजन्य काळात पेट्रोल डिझेलच्या किंमती वाढणार याची पूर्वसुचना पेट्रोलियम मंत्री हरदीप सिंग पुरी यांनी दिले होते.
