इंदापूर तालुक्यातील 1,055 दिव्यांगांची दिवाळी गोड; 36.92 लाखांचे अनुदान खात्यात जमा
हे अनुदान थेट लाभ हस्तांतरण (डीबीटी) प्रणालीद्वारे पात्र लाभार्थ्यांच्या बँक खात्यात जमा करण्यात आले आहे. दिवाळीच्या काळात मिळालेल्या या आर्थिक मदतीमुळे दिव्यांग बांधव आणि त्यांच्या कुटुंबीयांमध्ये आनंदाचे वातावरण निर्माण झाले आहे.
दिव्यांग व्यक्तींना आर्थिक आधार मिळावा, त्यांच्या दैनंदिन गरजा पूर्ण करण्यास मदत व्हावी तसेच त्यांचे जीवनमान उंचावण्यासाठी हातभार लागावा, या उद्देशाने ही योजना राबविण्यात येते. सणासुदीच्या काळात अनुदान मिळाल्याने लाभार्थ्यांना आर्थिक नियोजनातही मदत होणार आहे.
पंचायत समितीच्या नियोजनातून अनुदान वितरण
अनुदान वितरणाची प्रक्रिया वेळेत आणि पारदर्शक पद्धतीने पूर्ण करण्यासाठी पंचायत समिती इंदापूरच्या वतीने विशेष नियोजन करण्यात आले होते. गटविकास अधिकारी सचिन खुडे यांच्या मार्गदर्शनाखाली समाजकल्याण विभागाचे कनिष्ठ सहाय्यक वैभव नाळे, अर्थ विभागाचे कॅशियर किरण गायकवाड आणि सहाय्यक लेखाधिकारी सोमनाथ मोहिते यांनी प्रशासकीय प्रक्रिया तत्परतेने पूर्ण केली.
शासकीय योजनांचे अनुदान थेट बँक खात्यात जमा होत असल्याने मध्यस्थांशिवाय लाभार्थ्यांना आर्थिक मदत मिळत आहे. प्रशासनाच्या या तत्पर कार्यवाहीमुळे दिव्यांग कुटुंबांना सणासुदीच्या काळात दिलासा मिळाला असून, या उपक्रमाचे सर्वत्र कौतुक होत आहे.
