उत्तरप्रदेशातील बागपत जिल्ह्यातील नौरोजपूर गुर्जर गावात एका ३४ वर्षीय व्यक्तीची त्याच्या पत्नीने आणि तिच्या प्रियकराने कथितरित्या हत्या केली असून, आरोपींनी हा मृत्यू कीटकनाशक अन्नात मिसळून झाल्याचे भासवण्याचा प्रयत्न केला आहे. पण पोलिसांच्या तपासात गुन्हा उघडकीस आला असून पत्नीला अटक करण्यात आली आहे. गुन्ह्यात सामील असलेला प्रियकर फरार आहे, असे पोलिसांनी रविवारी सांगितले.
सचिन डागर असे मृताचे नाव असून त्यांची शुक्रवारी रात्री पत्नी रचना आणि तिचा प्रियकर, जवळच्या रणछाड गावचा रहिवासी सोनू यांनी कथितरित्या हत्या केली. रचनाला अटक करण्यात आली असून, सोनू अद्याप फरार असून पोलीस त्याचा शोध घेत आहेत.
सचिनचा भाऊ नवीन याच्या म्हणण्यानुसार, शनिवारी पहाटे ३:३३ च्या सुमारास रचनाचा फोन आला. तिने सांगितले की, शुक्रवारी शेतात कीटकनाशकांची फवारणी केल्यानंतर सचिनची प्रकृती खालावली होती आणि रात्री अचानक त्याची प्रकृती अधिकच बिघडली होती.
कुटुंबीयांनी सचिनला तातडीने बारौत येथील एका खाजगी रुग्णालयात दाखल केले. तेथील डॉक्टरांनी त्याला दुसऱ्या रुग्णालयात पाठवले, जिथे अखेरीस त्याला मृत घोषित करण्यात आले.
मात्र, सचिनच्या अंतिम संस्कारांची तयारी करत असताना त्याच्या मानेवर खुणा दिसल्याने कुटुंबीयांना संशय आला. त्यानंतर त्यांनी शेजारच्या घरात लावलेल्या सीसीटीव्ही कॅमेऱ्याचे फुटेज तपासले . मिळालेल्या माहितीनुसार, त्या फुटेजमध्ये एक अज्ञात व्यक्ती शुक्रवारी रात्री १० वाजण्याच्या सुमारास सचिनच्या निवासस्थानी प्रवेश करताना आणि शनिवारी पहाटे सुमारे ३:२८ वाजता बाहेर पडताना दिसला.
सीसीटीव्ही पुराव्यामुळे पोलिसांनी आपला तपास अधिक तीव्र केला. बागपतचे पोलीस अधीक्षक सूरज कुमार राय यांनी सांगितले की, प्राथमिक चौकशीदरम्यान रचनाने वारंवार सांगितले की तिच्या पतीचा मृत्यू कीटकनाशकांच्या संपर्कामुळे झाला होता. मात्र, दीर्घकाळ चाललेल्या चौकशीत तिने आपल्या प्रियकरासोबत सचिनच्या हत्येचा कट रचल्याची कबुली दिली.
पोलिसांच्या म्हणण्यानुसार, रचनाने सांगितले की, सोनू शुक्रवारी गुंगीच्या गोळ्या घेऊन आला होता. तिने त्या गोळ्या खीरमध्ये मिसळून आपल्या पतीला दिल्या. सचिन झोपल्यानंतर, तिने सोनूशी संपर्क साधून त्याला घरी बोलावले.
तपास अधिकाऱ्यांनी सांगितले की, सोनूच्या प्रवेशाला सोयीस्कर व्हावे म्हणून रचनाने मुद्दाम दरवाजा उघडा ठेवला होता. त्या दोघांनी मध्यरात्रीच्या सुमारास सचिनच्या चेहऱ्यावर आणि मानेवर उशी दाबून त्याचा गळा दाबला, असा आरोप आहे. हत्येनंतर, सोनू निघून जाण्यापूर्वी ते दोघे जवळपास साडेतीन तास घरात एकत्र राहिले, असेही सांगण्यात आले आहे.
मनाविरुद्ध लग्न, इन्स्टाग्रामवर भेटला प्रियकर
चौकशीदरम्यान, रचनाने पोलिसांना सांगितले की, तिची सोनूशी ओळख इंस्टाग्रामवरून झाली होती. त्यांच्या ऑनलाइन संभाषणातून नंतर नियमित फोन आणि नातेसंबंध सुरू झाले. तिने पुढे असाही आरोप केला की, ती तिच्या लग्नात आनंदी नव्हती आणि तिचा नवरा तिला वारंवार मारहाण करत असे.
पोलिसांनी सांगितले की, शवविच्छेदन अहवाल आणि सीसीटीव्ही फुटेजमुळे तपासातील महत्त्वाच्या बाबींना दुजोरा मिळाला, ज्यामुळे रचनाला अटक करण्यात आली.
"त्या महिलेने तिच्या प्रियकराच्या संगनमताने पतीची हत्या केली. आरोपी महिलेला अटक करण्यात आली असून, तिच्या प्रियकराचा शोध सुरू आहे. त्याला लवकरच अटक केली जाईल," असे एसपी सूरज कुमार राय यांनी सांगितले.पोलिसांनी सोनूला पकडण्यासाठी शोधमोहीम सुरू केली असून या प्रकरणाचा पुढील तपास सुरू आहे.
.
