आपल्या आधीच्या पतीला त्याच्या आई आणि भाचीसह पत्नीने क्रूरपणे संपवल्याची घटना समोर आली आहे. राजस्थानच्या अजमेर जिल्ह्यात एका माजी सरपंचासह एकाच कुटुंबातील चार सदस्यांची त्यांच्या पहिल्या पत्नीने आणि तिच्या किशोरवयीन मुलगा व मुलीने क्रूरपणे हत्या केली, त्यानंतर त्यांचे मृतदेह एका एसयूव्हीमध्ये जाळण्यात आले, अशी माहिती पोलिसांनी गुरुवारी दिली. ही घटना गुरुवारी पहाटे अजमेर जिल्ह्यातील बोराडा पोलीस ठाण्याच्या हद्दीतील श्री रामपुरा गावात घडली.
पोलिसांनी सांगितले की, पहाटे ५.३० च्या सुमारास त्यांना एका स्कॉर्पिओ गाडीला आग लागल्याची आणि त्यात अनेक लोक अडकल्याची माहिती मिळाली. घटनास्थळी पोहोचल्यावर अधिकाऱ्यांना एसयूव्हीमध्ये तीन जळालेले मृतदेह आढळले, तर जवळच्याच एका शेतात आणखी एक महिला अर्धवट जळालेल्या अवस्थेत सापडली. उपचारादरम्यान तिचा मृत्यू झाला.
मृतकांमध्ये माजी सरपंच राम सिंह चौधरी (४५), त्यांची आई आणि माजी सरपंच पुसी देवी (८५), त्यांची दुसरी पत्नी सुरग्यन देवी (४०) आणि भाची महिमा यांचा समावेश आहे.
पोलिसांनी असा आरोप केला आहे की, आरोपीने घरातच एका धारदार शस्त्राने चारही पीडितांचे गळे चिरले. अजमेरचे पोलीस अधीक्षक हर्षवर्धन अग्रवाल म्हणाले, “राम सिंगची पहिली पत्नी, ४० वर्षीय सुनीता हिला अटक करण्यात आली आहे, तर तिच्या १६ वर्षीय मुलाला आणि १९ वर्षीय मुलीला या हत्याकांडातील कथित भूमिकेप्रकरणी ताब्यात घेण्यात आले आहे.”
पोलिसांनी असा आरोप केला आहे की, मृत्यू हा रस्ते अपघात वाटावा या प्रयत्नात, स्कॉर्पिओ एसयूव्ही घरापासून सुमारे ५०० मीटर दूर नेऊन तिला आग लावण्यापूर्वी एका ट्रॅक्टरमधून डिझेल काढण्यात आले होते.
पोलिसांनी सांगितले की, राम सिंगने २००४ मध्ये सुनिताशी आणि नंतर २०१९ मध्ये सुरग्यन देवीशी लग्न केले होते. दुसऱ्या लग्नानंतर कुटुंबातील तणाव वाढला असावा, अशी शक्यता आहे.
"प्राथमिक तपासात असे उघड झाले आहे की, राम सिंग अनेक वर्षांपासून आपल्या पहिल्या पत्नी आणि मुलांचा शारीरिक व मानसिक छळ करत होता. बुधवारी रात्री त्याने त्यांच्यावर पुन्हा हल्ला केला, या घटनेनंतर आरोपी महिला आणि तिच्या मुलांनी कथितरित्या हत्येचा कट रचला," असे एसपींनी सांगितले.
पोलिसांनी दिलेल्या माहितीनुसार, आरोपींनी परस्परविरोधी जबाब दिल्याने आणि घटनेनंतर त्यांचे वर्तन असामान्य वाटल्याने संशय वाढला. पोलिसांच्या म्हणण्यानुसार, सुनीता रडण्याचे नाटक करत होती, तर तिचा मुलगा शांतपणे चहा पीत होता आणि सुरुवातीला त्या दोघांपैकी कोणीही घटनास्थळाजवळ गेले नाही
.
