संयुक्त कारवाईत भारतीय तटरक्षक दलाने अरबी समुद्रात पाकिस्तानी बोट पकडली, 80 किलो अमली पदार्थ जप्त

भारतीय तटरक्षक दलाने (ICG) सोमवार आणि मंगळवारच्या मध्यरात्री अरबी समुद्रात पोरबंदर किनाऱ्यापासून सुमारे 350 किमी अंतरावर 480 कोटी रुपयांचे अमली पदार्थ घेऊन जाणाऱ्या सहा क्रू सदस्यांसह एका पाकिस्तानी बोटीला पकडले. पुढील तपासासाठी पोरबंदरला आणल्या जात असलेल्या बोटीतून जवळपास 80 किलो अंमली पदार्थ जप्त करण्यात आले आहेत, असे ICG ने मंगळवारी दिलेल्या निवेदनात म्हटले आहे.विशिष्ट गुप्त माहितीच्या आधारे ICG, दहशतवादी विरोधी पथक (ATS) आणि नार्कोटिक्स कंट्रोल ब्युरो (NCB) यांनी संयुक्तपणे ही कारवाई केली. ICG च्या म्हणण्यानुसार, "संभाव्य ठिकाणी बोट स्कॅन आणि शोधण्यासाठी" एक डॉर्नियर विमान तैनात करण्यात आले होते, त्यानंतर NCB आणि ATS गुजरातच्या पथकांसह ICG जहाजांनी "अंधारात संशयास्पदरीत्या फिरत असलेली बोट ओळखली". ICG म्हणाले, "आव्हान मिळाल्यावर, बोटीने टाळाटाळ सुरू केली." त्या बोटीचा पाठलाग करून तिला थांबवण्यास भाग पाडण्यात आले. ICG ने ATS आणि NCB सोबत गेल्या तीन वर्षांत अशाच प्रकारच्या संयुक्त कारवाईत ३१३५ कोटी रुपयांचे ५१७ किलो अमली पदार्थ जप्त केले, असे निवेदनात म्हटले आहे.