इम्रान खान यांची प्रकृती बिघडली

कारागृहात डॉक्टरांच्या पथकाकडून वैद्यकीय तपासणी

वृत्तसंस्था/ रावळपिंडी

पाकिस्तानचे माजी पंतप्रधान इम्रान खान यांच्या प्रकृतीबद्दल वाढत्या चिंतेच्या पार्श्वभूमीवर, रावळपिंडी येथील अदियाला तुरुंगात त्यांची वैद्यकीय तपासणी करण्यात आली. भ्रष्टाचाराच्या एका प्रकरणात दोषी ठरल्यानंतर 73 वर्षीय इम्रान खान यांना 2023 पासून या उच्च-सुरक्षा तुरुंगात ठेवण्यात आले आहे. त्यांना अपुरी वैद्यकीय सेवा मिळत असल्याच्या समर्थकांच्या आरोपांच्या पार्श्वभूमीवर, पाकिस्तान इन्स्टिट्यूट ऑफ मेडिकल सायन्सेसच्या डॉक्टरांनी रविवारी त्यांची परिपूर्ण तपासणी केली. डॉक्टरांनी इम्रान खान यांच्या रक्तदाब, कोलेस्ट्रॉल आणि डोळ्यांच्या आरोग्यासह आवश्यक चाचण्या केल्या. वैद्यकीय पथकाने तुरुंगातील डॉक्टरांच्या मदतीने इम्रान खान यांच्या प्रकृतीचे सविस्तर मूल्यांकन केले. यापूर्वी डोळ्यांच्या त्रासाची तक्रार केल्यामुळे त्यांची रुग्णालयातही तपासणी करण्यात आली होती.