मणिपूरमध्ये रायफल्ससह मोठा शस्त्रसाठा जप्त

इम्फाळ : मणिपूरमधील इम्फाळ पूर्व जिह्यातील चंफई हिल्समध्ये सुरक्षा दलांनी गेल्या दोन दिवसात शस्त्रास्त्रांचा मोठा साठा जप्त केला. मणिपूरच्या विविध भागांमध्ये शस्त्रे आणि दारूगोळा जप्त केल्याची माहिती पोलीस सूत्रांनी गुरुवारी दिली. चंफई येथून एम-16 रायफल, 22 रायफल, 2 एसएलआर, देशी बनावटीच्या स्टेन गन, 2 कार्बाईन, 8 पिस्तूल, 12 मोर्टार आणि 30 मॅगझिन जप्त केल्या आहेत. लुवांगशांगबाम भागात दुसऱ्या एका कारवाईत सुरक्षा दलांनी 32 बोअरची दोन पिस्तूल, 9 मिमीचे एक पिस्तूल आणि इतर वस्तू जप्त केल्या. त्याव्यतिरिक्त विष्णुपूर जिह्यातील खेलखेंग आणि जेलबुंग गावातही अशीच कारवाई करण्यात आली. तेथे एके-47 रायफल, 12 बोअरची सिंगल बॅरल रायफल, 5 डिटोनेटर आणि अडीच किलो वजनाची आयईडी जप्त करण्यात आली.