होंडाच्या 200 सीसीपेक्षा अधिक क्षमतेच्या दुचाकी, ईव्ही स्कूटर्स येणार

नवी दिल्ली :

होंडा मोटरसायकल अँड स्कूटर इंडिया भारताच्या दुचाकी बाजारावरील आपली पकड मजबूत करण्यासाठी यावर्षी अनेक नवीन उत्पादने लॉन्च करण्याच्या तयारीत आहे. कंपनी लवकरच 200 सीसीपेक्षा जास्त क्षमतेच्या 2-3 नवीन प्रीमियम मोटरसायकल्स आणि नवीन इलेक्ट्रिक स्कूटर्स लॉन्च करणार आहे. वाढते उत्पन्न, प्रीमियम बाईक्सची वाढती मागणी आणि इलेक्ट्रिक मोबिलिटीची लोकप्रियता लक्षात घेऊन होंडाने ही रणनीती आखली आहे.

होंडाच्या सध्याच्या मोटरसायकल विक्रीमध्ये 110 सीसी ते 125 सीसी कम्युटर बाईक्सचा मोठा वाटा आहे. आर्थिक वर्ष 2025-26 मध्ये, कंपनीने 31.6 लाख स्कूटर्स आणि 25.9 लाख मोटरसायकल्स विकल्या. तथापि, 151 सीसी ते 350 सीसी सेगमेंटचा वाटा केवळ 13 टक्के होता. यामुळे, कंपनीला आता प्रीमियम सेगमेंटमध्ये आपले स्थान अधिक मजबूत करायचे आहे.

कंपनीचे अध्यक्ष, सीईओ आणि व्यवस्थापकीय संचालक त्सुत्सुमु ओटानी यांच्या मते, पूर्वी प्रीमियम आणि रिक्रिएशनल बाईक्सची बाजारपेठ मर्यादीत होती, परंतु आता वाढते उत्पन्न व जागतिक उत्पादने सहज उपलब्ध झाल्यामुळे ग्राहकांच्या पसंती बदलत आहेत. त्यांनी पुढे सांगितले की, ही वाढती मागणी लक्षात घेऊन कंपनी भारतीय बाजारपेठेसाठी अधिक स्थानिक मॉडेल्स तयार करत आहे.

होंडा इलेक्ट्रिक स्कूटर

प्रीमियम बाईक्ससोबतच, होंडा यावर्षी नवीन इलेक्ट्रिक स्कूटर्सदेखील लॉन्च करणार आहे. तथापि, कंपनी इलेक्ट्रिक वाहनांच्या बाजारपेठेत हळूहळू विस्तार करेल. होंडाचे म्हणणे आहे की, चार्जिंग पायाभ्aाtत सुविधांचा विकास आणि ग्राहकांची मागणी यावर आधारित भविष्यातील धोरण निश्चित केले जाईल.

वाढती मागणी लक्षात घेऊन, होंडा राजस्थानमधील तापुकरा आणि गुजरातमधील विठ्ठलपूर येथील आपल्या प्लांटमध्ये दरवर्षी 6.5 लाख युनिट्सची अतिरिक्त उत्पादन क्षमता वाढवत आहे. या विस्तारानंतर, कंपनीची एकूण वार्षिक उत्पादन क्षमता आर्थिक वर्ष 2028 पर्यंत सुमारे 80 लाख युनिट्सपर्यंत पोहोचेल.