चेन्नईचा हरिकृष्णन ‘सतीश शुगर्स’चा मानकरी

बेळगाव : सतीशअण्णा फॅन्स क्लब, बेळगावतर्फे आयोजित,राष्ट्रीय बुद्धिबळ स्पर्धा बेळगाव शहरातील खानापूर रोड येथील प्रशस्त महावीर भवनात शनिवार दि. 28 व रविवार दि 29 रोजी भरविण्यात आली होती. देशभरातील तब्बल 358 बुद्धिबळपटूंनी यामध्ये सहभाग घेतला होता. ही स्पर्धा राष्ट्रीय स्तरावर आयोजित केल्यामुळे अनेक लहान-मोठ्या वयोगटातील दिग्गज खेळाडूंनी यात भाग घेतला होता. त्यामुळे सहभागी खेळाडूंना अनेक ख्यातनाम खेळाडू सोबत खेळण्याची संधी प्राप्त झाली.दरम्यान या स्पर्धेत अत्यंत चुरशीच्या लढती पहायला मिळाल्या.

या स्पर्धेत चेन्नईच्या हरिकृष्णन एआर  2242 रेटिंगवर, एस एटीन प्रकारात, 8 पूर्णांक 5 या गुणाने विजयी होत प्रथम क्रमांकाचा मानकरी ठरला. त्याला रोख 1 लाख ऊ., आकर्षक चषक व प्रमाणपत्र देण्यात आले.  मुंबईच्या  मोहम्मद नुबेरशाह शेख याने 2236 रेटिंगवर, एस एटीन प्रकारात, 8 गुण मिळवून दुसरा क्रमांक पटकावित तो रोख  50 हजार ऊपये, आकर्षक चषक व प्रमाणपत्राचा मानकरी ठरला. गोव्याच्या वाज इथेन याने 2282  रेटिंगवर,  उंडर 14 प्रकारात 8 गुण मिळवून रोख 25 हजार ऊपये, आकर्षक चषक आणि प्रमाणपत्र मिळवून तिसरा क्रमांक पटकाविला. तसेच इतर 112 विजयी स्पर्धकांना आकर्षक चषक, रोख रक्कम आणि प्रमाणपत्र प्रमुख पाहुणे युवा काँग्रेस नेते राहुल जारकीहोळी यांच्या हस्ते देण्यात आले.