गुकेशपुढे डळमळीत मोहीम सावरण्याचे आव्हान
वृत्तसंस्था
ओस्लो : खडतर सुऊवातीनंतर खचलेला डी. गुकेश विश्रांतीनंतर परतला असून नॉर्वे बुद्धिबळ स्पर्धा पुन्हा सुरू झाल्यावर तो एका नव्या ऊर्जेच्या शोधात असेल. नुकत्याच 20 वर्षांचा झालेला हा विश्वविजेता आशा करत असेल की, त्याचा वाढदिवस येथील त्याच्या डळमळीत मोहिमेला कलाटणी देणारा ठरेल.
जरी त्याचा सहकारी भारतीय खेळाडू आर. प्रज्ञानंद याची कामगिरी खूपच चांगली झाली असली आणि तो सहा खेळाडूंच्या खुल्या क्रमवारीत दुसऱ्या स्थानावर असला, तरी स्पर्धेत शेवटच्या स्थानावर असूनही गुकेशच अधिक लक्ष वेधून घेत आहे. याचे कारण केवळ विश्वविजेतेपदाचे वलयच नाही, तर त्याच्या शांत, गूढ व्यक्तिमत्त्वाभोवती असलेले कुतूहलही आहे.
आता पाचव्या फेरीत प्रज्ञानंदविऊद्ध गुकेश कशी कामगिरी करतो हे पाहणे उत्सुकतेचे ठरेल. या पूर्णपणे भारतीय खेळाडूंमधील लढतीवरून हे ठरण्याची शक्यता आहे की, विश्वविजेता अजूनही विजेतेपदाचा खरा दावेदार म्हणून उदयास येऊ शकतो की, या उच्चभ्रू स्पर्धेत त्याची मोहीम डळमळीतच राहील. गुऊवारी दिवसभर ओस्लोला खिळवून ठेवणाऱ्या ब्लॉकबस्टर लढतीत जागतिक क्रमवारीत अव्वल असलेल्या मॅग्नस कार्लसनकडून पराभूत झाल्यानंतर गुकेश शांतपणे स्पर्धेतून बाहेर पडला, तर दुसरीकडे प्रज्ञानंदने अधिक चिवट खेळ करून सर्वांचे लक्ष वेधून घेतले. त्याने प्रथम क्लासिकल बुद्धिबळात अलीरेझा फिरौजाची अपराजित मालिका खंडित केली आणि नंतर आर्मागेडन टायब्रेकरमध्ये त्याचा धुव्वा उडवला.
या दोन भारतीय खेळाडूंच्या परस्परविरोधी कामगिरीकडे प्रेक्षकांचे दुर्लक्ष झालेले नाही. या वर्षी गुकेश आपल्या विश्वविजेतेपदाचे रक्षण करणार असल्याने तो पुनरागमन करेल का हे पाहण्यासाठी अनेक प्रेक्षक उत्सुक आहेत. तथापि, नॉर्वे चेस स्पर्धेपूर्वी त्याने स्वत:च कबूल केलेले आहे की, विश्वविजेता बनल्यानंतर त्याच्या कामगिरीत झालेल्या घसरणीबद्दलची टीका योग्य आहे.
विश्रांतीच्या दिवसातील मनोरंजक उपक्रमांमुळे गुकेशला कदाचित वेळेवर उभारी मिळाली असेल. शुक्रवारी तो 20 वर्षांचा झाल्यामुळे त्याला नॉर्वे चेसच्या आयोजकांकडून वाढदिवसाची भेटही मिळाली. विश्रांतीच्या दिवशी सर्व 12 खेळाडूंनी (खुल्या गटातील सहा आणि महिलांच्या गटातील सहा) बुद्धिबळाचे पट सोडून ओस्लोफ्योर्डच्या पाण्यात प्रवेश केला. यावेळी खेळाडूंना त्यांच्या नौकानयन कौशल्याची चाचणी घेण्यासाठी दोन शिडाच्या बोटींवर नेण्यात आले.