गुजरात जायंट्सची प्लेऑफच्या दिशेने वाटचाल प्रो कबड्डी लीग : बंगाल वॉरियर्सवर विजय

वृत्तसंस्था/ कोलकाता

गुजरात जायंट्सने बंगाल वॉरियर्सवर 41-32 असा विजय मिळवित प्रो कबड्डी लीगच्या प्लेऑफमध्ये स्थान मिळविण्याच्या दिशेने आगेकूच केली.

या विजयानंतर गुजरात संघ 19 सामन्यांतून 60 गुण मिळवित चौथ्या स्थानावर पोहोचला आहे. या सामन्यात सुरुवातीला मनिंदर सिंगने काही रेडपॉईंट्स मिळविल्याने पाचव्या मिनिटाला वॉरियर्सने 5-3 अशी आघाडी घेतली. फाझल अत्राचलीने अप्रतिक टॅकल करीत नवीन कुमारला बाद केले तरी वॉरियर्सने 6-4 अशी आघाडी कायम ठेवली. नंतर प्रतीक दाहियाने सुपर रेडवर अक्षय कुमार, वैभव गर्जे व जसकिरत सिंग यांना बाद करीत गुजरातला प्रथमच 8-6 अशी आघाडी मिळवून दिली. 12 व्या मिनिटाला गुजरातने बंगालला ऑलआऊट करीत 12-7 अशी भक्कम आघाडी घेतली.

नंतर जायंट्सने आणखी एकदा ऑलआऊट केले तर वॉरियर्सनेही गुजरातला ऑलआऊट करीत गुजरातची आघाडी कमी केली. पण राकेशने सुपर रेडवर तीन खेळाडूंना बाद करीत गुजरातचा विजय निश्चित केला.