भाजप जाहीरनाम्यात ‘युसीसी’ची गॅरंटी

वृत्तसंस्था/ नवी दिल्ली

लोकसभा निवडणुकीसाठी रविवारी भाजपने जाहीरनामा प्रसिद्ध केला. त्याला ‘संकल्पपत्र’ असे नाव देण्यात आले असून त्यात अनेक प्रकारची आश्वासने देण्यात आली आहेत. एक राष्ट्र, एक निवडणूक ही संकल्पना साकार करण्याचा संकल्प घेऊन आम्ही पुढे जाऊ. तसेच राष्ट्रीय हिताच्यादृष्टीने समान नागरी संहितेलाही (युसीसी) प्राधान्य देण्यात येणार असल्याचे भाजपने जाहीर केले. जाहीरनामा प्रसिद्ध करण्यापूर्वी एक रील सामायिक करत विकसित भारताची झलक सादर करण्यात आली. त्यात गेल्या 10 वर्षातील आश्वासने आणि त्यांची पूर्तता यांचे सादरीकरण करण्यात आले.

लोकसभा निवडणुकीच्या पहिल्या टप्प्यासाठी 19 एप्रिलला मतदान होणार आहे. याच्या अवघ्या 5 दिवस आधी भारतीय जनता पक्षाने रविवारी आपला निवडणूक जाहीरनामा जारी केला. पंतप्रधान नरेंद्र मोदी यांनी रविवारी दिल्लीतील पक्ष कार्यालयात भाजपचा जाहीरनामा प्रसिद्ध केला. पंतप्रधानांसह गृहमंत्री अमित शहा, संरक्षणमंत्री राजनाथ सिंह आणि पक्षाध्यक्ष जे. पी. न•ा यांच्या उपस्थितीत रविवारी भाजपचा जाहीरनामा प्रकाशित करण्यात आला. आमचा भर गुंतवणुकीपेक्षा नोकऱ्यांवर आहे. याप्रसंगी पंतप्रधान मोदींनी गरिबांसाठीची रेशनवरील मोफत धान्य योजना पुढील 5 वर्षे सुरू ठेवण्याचे आश्वासन दिले.

पक्षाचे अध्यक्ष न•ा आणि ठराव समितीचे अध्यक्ष राजनाथ सिंह यांनी आपले विचार मांडले. यानंतर पंतप्रधान मंचावर आले. 46 मिनिटांच्या भाषणात गेल्या 10 वर्षांच्या कामाचा लेखाजोखा मांडताना अनुच्छेद 370, महिला आरक्षणासारखी आश्वासने पूर्ण केल्याचे सांगितले. त्यानंतर मोदींनी 2024 च्या आश्वासनांची माहिती दिली. यामध्ये आयुष्मान भारत योजनेंतर्गत 70 वर्षांवरील वृद्धांना 5 लाख ऊपयांपर्यंत मोफत उपचार, गरिबांसाठी 3 कोटी घरे, 2029 पर्यंत गरिबांना मोफत रेशन देण्याची हमी देण्यात आली होती. 4 जूनला निकाल जाहीर झाल्यानंतर लगेचच भाजपच्या ‘संकल्पपत्र’वर काम सुरू होईल. सरकारने 100 दिवसांच्या कृती आराखड्यावर काम सुरू केले आहे. देशातील जनतेची महत्त्वाकांक्षा पूर्ण करणे भाजपचे ध्येय असल्याचे प्रतिपादन पंतप्रधानांनी केले.

भाजपने जाहीरनाम्याचे पावित्र्य पुन्हा प्रस्थापित केल्याचे पंतप्रधानांनी ठासून सांगितले. हे ठरावपत्र युवा शक्ती, महिला शक्ती, गरीब आणि शेतकरी या विकसित भारताच्या 4 मजबूत स्तंभांना सक्षम करते असेही पंतप्रधान म्हणाले. आमचे लक्ष जीवनाची प्रतिष्ठा, जीवनाचा दर्जा आणि गुंतवणुकीद्वारे नोकऱ्यांवर आहे. मोफत रेशन योजनेतून पुढील 5 वर्षे गरिबांना दिले जाणारे अन्न पौष्टिक, समाधानकारक आणि परवडणारे असेल याची आम्ही खात्री करू, असेही ते म्हणाले.

पंतप्रधान मोदी पुढे म्हणाले की, आता भाजपने 70 वर्षांवरील प्रत्येक वृद्ध व्यक्तीला आयुष्मान योजनेच्या कक्षेत आणण्याचा संकल्प केला आहे. 70 वर्षांवरील प्रत्येक वृद्ध व्यक्ती, मग तो गरीब, मध्यमवर्गीय किंवा उच्च मध्यमवर्गीय असो, त्यांना 5 लाख ऊपयांपर्यंत मोफत उपचाराची सुविधा मिळणार आहे, असेही त्यांनी सांगितले. भाजप सरकारने गरिबांसाठी 4 कोटी पक्की घरे बांधली आहेत. आता, राज्य सरकारांकडून मिळणाऱ्या अतिरिक्त माहितीचा विचार करून, त्या कुटुंबांची काळजी करताना आणखी 3 कोटी घरे बांधण्याचे वचन घेऊन आम्ही पुढे जाऊ. आतापर्यंत आम्ही प्रत्येक घरापर्यंत स्वस्त सिलिंडर पोहोचवले आहेत, आता आम्ही प्रत्येक घरात पाईपलाईनद्वारे स्वयंपाकाचा गॅस पोहोचवण्यासाठी वेगाने काम करणार असल्याचे प्रतिपादनही त्यांनी केले.

सबका साथ, सबका विकास हाच आत्मा आहे आणि हाच भाजपच्या संकल्प पत्राचा आत्मा आहे. गेल्या 10 वर्षात आम्ही दिव्यांगांसाठी अनेक सुविधा दिल्या आहेत. पंतप्रधान आवास योजनेत आता दिव्यांग मित्रांना प्राधान्य दिले जाईल, त्यांना त्यांच्या विशेष गरजेनुसार घरे मिळावीत यासाठी विशेष काम केले जाणार आहे. आपण गावाच्या संपूर्ण अर्थव्यवस्थेकडे पाहतो. त्यामुळे शेती असो, पशुपालन असो किंवा मत्स्यपालन असो, आम्ही या सर्वांना सशक्त करत आहोत. आमच्या पशुपालक आणि मच्छीमार बंधू-भगिनींना किसान व्रेडिट कार्डच्या कक्षेत समाविष्ट करून घेणारा भाजपच आहे. देशातील 10 कोटी शेतकऱ्यांना पीएम किसान सन्मान निधीचा लाभ भविष्यातही मिळत राहील, असेही ते म्हणाले.

‘यूएन’मध्ये स्थान, चंद्रावर माणूस...

पंतप्रधान नरेंद्र मोदी यांनी जाहीर केलेल्या लोकसभा निवडणुकीच्या जाहीरनाम्यात दोन खास गोष्टींचा ठळकपणे उल्लेख करण्यात आला आहे. जाहीरनाम्यात भारताच्या पहिल्या मानवी अंतराळ उ•ाण मोहिमेचे गगनयान आणि चंद्रावर अंतराळवीरांचे लँडिंग यांचा समावेश आहे. संयुक्त राष्ट्र सुरक्षा परिषदेत (युएनएससी) भारताला कायमस्वरूपी जागा मिळेल, असा आशावादही व्यक्त करण्यात आला आहे. तसेच आमचे मुख्य लक्ष चंद्रावर अंतराळवीरांना उतरवण्यावर असून हे अमृत काळातील भारताच्या प्रगती आणि समृद्धीचे लक्षण असल्याचेही त्यांनी नमूद केले. भारताला आघाडीची अंतराळ शक्ती म्हणून प्रस्थापित करण्यासाठी भारतीय अंतराळ स्थानक स्थापन करण्याबाबतही भाजपने जाहीरनाम्यात भाष्य केले. तसेच देशासाठी दुसरे लाँच पॅडही स्थापन केले जाणार असल्याचे सांगण्यात आले.

दहशतवादाशी मुकाबला करण्यावर भर

आंतरराष्ट्रीय दहशतवादाविरोधातील सर्वसमावेशक अधिवेशनावर संयुक्त राष्ट्रांच्या सर्व सदस्यांमध्ये एकमत निर्माण करण्यासाठी आणि अशा घटनांना तोंड देण्यासाठी इतर प्रयत्नांवर सरकार प्रयत्न सुरू ठेवणार असल्याचेही भाजपने म्हटले आहे. दहशतवादाला वित्तपुरवठा रोखण्यासाठी समन्वय विकसित करण्यासाठी ‘नो मनी फॉर टेरर’ परिषदेच्या यशस्वीतेवर काम केले जाईल, असे त्यात म्हटले आहे. दहशतवादाविऊद्ध देशाचे ‘झिरो टॉलरन्स’ धोरण मजबूत करण्यासाठी भाजपने सातत्याने काम केले आहे.